2024 yil iyul oyi davomida qanday ob-havo bo‘lishi maʼlum qilindi

O‘zgidromet iyul oyi davomida qanday ob-havo bo‘lishi bo‘yicha maʼlumot berdi.

Unga ko‘ra, iyul oyi qulay sharoitlardan boshlanadi. 1-3-iyul kunlari havo harorati 31-36 daraja issiq atrofida, janubda 38-40 darajagacha issiq bo‘ladi.

So‘ngra iyul oyi harorat tartibi bo‘yicha meʼyorga yaqin bo‘lishi kutilmoqda. Oyning katta qismida havo harorati 35-40 daraja issiq atrofida, janubda va cho‘l hududlarda 41-43 darajagacha issiq bo‘ladi. Faqat ayrim kunlarda harorat bu qiymatlardan 2-3 darajaga yuqori bo‘lishi mumkin.

O‘zbekiston hududining katta qismida o‘rtacha 40 daraja issiq va undan yuqori haroratli iyul oyida juda issiq kunlar soni ikki kundan besh kungachani, shimolda 6-8 kunni, janubda va cho‘l hududlarda 12-15 kunni tashkil etadi. So‘nggi yillarda bunday issiq kunlar sonining ko‘payishi tendensiyasi kuzatilmoqda.

Respublika bo‘yicha baʼzi joylarda, asosan tog‘ oldi va tog‘li hududlarda iyul oyining ayrim kunlarida mahalliy xususiyatga ega bo‘lgan qisqa muddatli yomg‘ir yog‘ishi va momaqaldiroq bo‘lishi ehtimoli bor.