Ўзбекистонда ҳаво ҳарорати 2–3 даража пасайиши кутилмоқда. Иқлимшунос Эркин Абдулаҳатов бу сезиларли пасайиш бўлмаслигини билдирди.
“Ўзгидромет” прогнозига кўра, мамлакатда 30—31 июль кунлари ҳаво ҳарорати бир оз пасаяди. Яъни икки кун давомида ҳарорат республика бўйлаб 34-39 даража иссиқ бўлади.
Эркин Абдулаҳатов фикрича, бу сезиларли даражадаги пасайиш эмас.
“30—31 июль кунлари ҳаво ҳарорати бир оз пасаяди. Аммо, бу сезиларли даражада салқинли эмас. Ҳозирги кунга нисбатан ҳароратлар 2—3 даража паст бўлади холос. Масалан, ой сўнгги кунларида жануб вилоятларда ҳаво ҳарорати +41 даражагача (ҳозир +44 даража), республиканинг бошқа қисмида +39 даражагача (ҳозир +41 ва +43 даража) кўтарилади”, деб ёзган мутахассис.
Ўзбекистонда 25 июлдан бери жуда иссиқ ҳарорат ҳукмрон. Кундуз кунлари аксарият ҳудудларда ҳаво ҳарорати +38 даражадан юқориламоқда. Кечалари ҳам ҳарорат 30 даражагача иссиқ бўлмоқда.
Айниқса, бир неча кундан бери Сурхондарё вилоятининг Термиз шаҳрида энг юқори ҳароратлар қайд этилмоқда. Масалан, 27 июль куни шаҳарда кузатувлар тарихидаги энг иссиқ ҳарорат рекорди қайта янгиланди. Яъни ҳудуддаги ҳаво ҳарорати максимуми +45 даражага етди.
Агар суткалик ҳарорат камида 43 ва ундан юқори даражада кетма–кет беш кун кузатилса, бу аномал иссиқ ҳисобланади. Бундай жазирама инсон соғлиғи учун ўта хавфли метеорологик ҳодиса сифатида таснифланади.
Эркин Абдулаҳатов фикрича, жорий юқори иссиқлик тўлиқини республиканинг катта қисмида иссиқлик аномалиясини келтириб чиқармади.
Аввалроқ Гидрометеорология илмий-тадқиқот институти Ўзбекистонда июль ва август ойи бошларида аномал иссиқ ҳаво кузатилишини прогноз қилганди.
Институт олимлари таҳлилида бундай ғайритабиий ҳарорат таъсирида минтақада термик депрессия (термал тушкунлик) вужудга келиши ҳам қайд этилган. Прогнозда Марказий Осиё текислик ҳудудларида ҳаво ҳарорати 44–46 даражагача, баъзи ҳолларда 48 даражагача иссиқ бўлиши мумкинлиги билдирилган.
Термик депрессиянинг давомийлиги 2–3 суткадан 5–7 суткагача, баъзи йилларда эса 1,5–2 ҳафтагача давом этиши кутилаётгани таъкиланган.
Олимлар фикрича, сўнгги пайтларда термик депрессия кузатилган даврда минтақа мамлакатларида қишлоқ хўжалиги, иқтисодиёт тармоқлари ҳамда энергетик тизимда кучли зўриқишлар кузатилмоқда.
Эслатиб ўтамиз, “Ўзгидромет” 25–29 июль кунлари Ўзбекистон бўйлаб жуда иссиқ об-ҳаво бўлишини прогноз қилган. Беш кун давомида республика ҳудудининг катта қисмида (Қорақалпоғистон Республикаси ва Хоразм вилоятидан ташқари) ҳаво ҳарорати кундуз кунлари 40–43 даражагача, жанубда ва чўл ҳудудларда 44–45 даражагача кўтарилиши қайд этилган.
Об-ҳавонинг кескин исиб кетиши биринчи навбатда болалар, қариялар ва беморларга оғир таъсир қилади. Ҳатто соғлом одамлар ҳам баъзи қоидаларга риоя этишларига тўғри келади. Жазирама юзага келгса, Соғлиқни сақлаш вазирлиги аҳолига жазирама иссиқдан сақланиш қоидаларини эслатган.
Вазирлик соат 10:00 дан 17:00 гача салқин жойларда бўлишни, пахта матоли либослар кийишни, кунига 3 литрдан кам бўлмаган миқдорда суюқлик ичишни тавсия қилган. Кун давомида илиқ душ қабул қилиш, вақти-вақти билан баданни совуқ сувда намланган дастрўмол билан артиб туриш ҳам танани ҳаддан зиёд қизиб кетишдан сақлаши таъкидланган.
Изоҳ (0)