Markaziy bank boshqaruvi ikki kompaniyaning litsenziyalarini ularning arizalari asosida chaqirib olish to‘g‘risida qaror qabul qildi. Bu haqda regulyator matbuot xizmati xabar berdi.
Qayd etilishicha, United Fintech brendi ostida faoliyat yuritgan “Qulay Pul” xususiy to‘lov tizimi operatorining litsenziyasi bekor qilinmoqda. 2021-yil 27-noyabrda kompaniya litsenziya olib, Humo va Uzcard’dan keyin uchinchi to‘lov tizimi operatoriga aylangandi.
O‘sha yilning dekabr oyida United Fintech asoschilari Spot’ga kartalar chiqarishni rejalashtirmayotgani va fintex bozoriga o‘zgartirishlar kiritish niyatida ekanini aytgan edi. Tizimni ishga tushirish bir necha bor qoldirilgan, aprel oyida esa Markaziy bank uning faoliyatini olti oyga cheklagandi.
“Milliy Pochta To‘lovlar” kompaniyasi 2020-yil may oyida olgan to‘lov tashkiloti litsenziyasidan mahrum bo‘ldi. Kompaniyaning ta’sischisi UzPost (“O‘zbekiston pochtasi”) bo‘lib, u bungacha “Avval” to‘lov tizimini ishga tushirishni rejalashtirgandi.
Eslatib o‘tamiz, Markaziy bank qarori asosida 2022-yilning oktyabr oyida “Turkistonbank” va Hi-Tech Bank xususiy banklaridan faoliyatini amalga oshirish huquqini beruvchi litsenziya chaqirib olingan va ular bankrot deb e’lon qilingan edi.
Izoh (0)