“Turkistonbank” bankrot deb e’lon qilindi

Markaziy bank “Turkistonbank”ni bankrot deb topilganini ma’lum qildi. Bu haqda bank matbuot xizmati xabar bermoqda. 

Ma’lum bo‘lishicha, 2023-yil 15-fevraldagi Toshkent tumanlararo iqtisodiy sudining “Turkiston” xususiy aksiyadorlik tijorat bankini bankrot deb topish to‘g‘risidagi hal qiluv qarori qabul qilingan. 

Bundan tashqari, Markaziy bank Boshqaruvining tegishli qaroriga asosan “Turkiston” xususiy aksiyadorlik tijorat bankining tugatish komissiyasi o‘z faoliyatini yakunlagani hamda sud tomonidan A. Keldiyev tugatish boshqaruvchisi etib tayinlangani ma’lum qilindi.

Markaziy bank boshqaruvining 2022-yil 7-oktabrdagi qaroriga asosan “Turkistonbank” va “Hi-tech bank” xususiy banklaridan bank faoliyatini amalga oshirish huquqini beruvchi litsenziya chaqirib olingandi.

O‘sha paytda “Turkistonbank” aktivlar hajmi bo‘yicha O‘zbekiston bank tizimida 26-o‘rinni egallagan. 

Keyinchalik “Turkistonbank” omonatchilarining mablag‘lari muddatidan avval qaytarilishi ma’lum qilingandi.