Тошкент шаҳрида фаолият юритувчи ягона аёл ҳоким — Нилуфар Аллабергенова “Дарё” журналисти билан суҳбатда Яккасарой туманига ташриф буюрган давлат раҳбарининг эътирофи, шунингдек, ҳоким сифатидаги хато-камчиликларини таҳлил қилиб борувчи асосий танқидчиси онаси экани ҳақида гапирди.
Онам ҳокимликнинг Telegram каналида эълон қилинаётган ҳар бир хабарни диққат билан ўқиб, менинг хато-камчиликларимни кузатиб туради. Уйга қайтганимда хатомни айтиб, “Мана шу жойда хато қилдинг, шу ерда нотўғри қарадинг, нотўғри гап гапирдинг”, деб дакки берадилар. Отам эса ўқитувчи бўлганлар, шу сабаб нимадир хато қилсам, менга уришиб, такрорламаслигим учун огоҳ қилиб туришади, — дейди Яккасарой тумани ҳокими ота-онаси ҳақида гапирар экан.
Туман ҳокимининг айтишича, унинг ҳар бир ҳаракатининг таг замирида халқни рози қилиш мақсади ётади.
Ҳар бир ишга бош-қош бўлиб, нимадир иш қилиш учун тайёргарлик кўраётганимизда шу тадбиримиз халққа ёқармикин, уларни рози қила олармикинмиз деган ўй билан бошланади. Тан олиш керак, бир вақтда ҳаммани рози қилиб бўлмайди. Ҳар бир ишнинг кимларгадир ёқмайдиган томонлари ҳам бўлади. Лекин ўша куни бир фуқаронинг 10 та муаммосидан биттасига ечим топиб, уни рози қилиб ортга қайтарсам, ўша куни уйимга бориб, тинч ўхлайман, — дейди Нилуфар Аллабергенова.
Ҳокимнинг айтишича, у ҳар куни ишдан сўнг “Мен бугун кимгадир ёрдам бера олдимми? Ёрдамим тегдими?”, — деган саволга жавоб излашга одатланган.
Ҳар куни эрталаб онамнинг дуосини олиб ишга чиқаман. Ва ишдан қайтаётганимда бугун ҳоким сифатида кимгадир ёрдам бера олдимми, ёрдамим тегдими деган саволларни ўзимга бераман ва тайинли жавоб қилишга ҳаракат қиламан, — дейди ҳоким.
Изоҳ (0)