Film suratga olishda o‘zining kiyimlari, uy hayvonlari va hatto uylaridan foydalangan Gollivud yulduzlari

Odatda film va seriallardagi hamma narsa maxsus tayyorlangan rekvizit bo‘ladi. Ammo suratga olish jarayonida aktyorlar va rejissyorlarning shaxsiy buyumlaridan foydalaniladi. Masalan, “Katta Lebovski” (1998) filmi bosh qahramonining mashhur libosi aktyor Jeff Brijsning garderobidan olingan. Kventin Tarantinoning “Quturgan itlar” (1992) filmining byudjeti shunchalik kichik ediki, aktyorlarning aksariyati o‘zlarining kiyimlarini kiyishgan.

Silvestr Stallone — “Rokki” (1976)

Rokki Balboaning sevimli hayvoni Butkus aslida Silvestr Stallonening iti edi. Aktyor Gollivud studiyalariga chiqish uchun “Rokki” ssenariysini yozayotganda puli tugab qoladi va kun kechirish uchun itini 40 dollarga sotishga majbur bo‘ladi.

Yaxshiyamki, Stallone ko‘p o‘tmay itini qaytarib oladi — lekin undan kattaroq summaga. “Butkusning yangi egasi mendan 15 ming dollar talab qildi. Ammo u bunga arzirdi” — deydi keyinchalik u: itini qaytarib olganini haqiqiy mo‘jiza deb ataydi. Silvesterning jonivori “Rokki” filmida suratga tushadi — itga Butkus Stallone nomi berilgan.

Enn Xeteuey — “Malikaning kundaligi” (2001)

“Malikaning kundaligi” romanining filmga moslashuvida bosh qahramon Miya Termopolisning yoqimli uy hayvoni — olachipor mushuk Lui bor. Luini to‘rtta mushuk o‘ynagan, ularning har biri ma’lum sahnalarda ishlatilgan: biri qo‘lda ko‘tarishlarini yaxshi ko‘rardi, boshqasi uzoq vaqt harakatsiz o‘tirishni, uchinchisi esa egasi bilan o‘ynashni yoqtirardi va hokazo. Lui rollarini ijro etgan jonivorlar orasida haqiqiy hayotda Miya rolini o‘ynagan Enn Xeteueyga tegishli bo‘lgan mushuk ham bo‘lgan.

Teylor Svift — “Hammasi juda yaxshi” (2021)

Mashhur qo‘shiqchi tomonidan yozilgan va rejissyorlik qilgan “Hammasi juda yaxshi” qisqa metrajli filmida qahramon Sedi Sink qandaydir uy oldidan o‘tadi. Ko‘plab muxlislar bu uy Teylorning qadrdon do‘stlaridan biri — Bleyk Layvli va uning turmush o‘rtog‘i Rayan Reynoldsga tegishli ekanini aytishgan.

Gap shundaki, filmdagi vitraj Bleykning ijtimoiy tarmoqlardagi postlaridan birida ham ko‘ringan. Bundan tashqari, “Dedpul va Rosomaxa”ning tizeri chiqqanida, muxlislar Rayan o‘tirgan mehmonxona ham “Hammasi juda yaxshi” filmidagi uyga o‘xshashligini ta’kidlashadi.

Mishel Yeo — “O‘ta boy osiyoliklar” (2018)

“O‘ta boy osiyoliklar” eng ko‘p sotilgan kitobga asoslangan film rejissyori Jon Chuning so‘zlariga ko‘ra, Mishel Yeo qahramoni Eleanor taqqan uzukni yoqtirmagan. Yulduz rejissyorga shaxsiy kolleksiyasidan zumrad va olmos uzukni ko‘rsatadi va oxir-oqibat u Eleanorning taqinchoqlariga aylanadi. Aktrisa xuddi shu uzukni “Oltin globus” mukofotida ham taqqan, unda “O‘ta boy osiyoliklar” filmi ikki nominatsiya bo‘yicha nomzod bo‘lgandi.

Greys Kelli — “Oliy jamiyat” (1956)

Teylor Jenkins Ridning romaniga asoslangan serial davomida bosh qahramonni o‘ynagan Rayli Kio o‘zining gitarasida chaladi. Naqshli gitara kamari esa aktrisaning bobosi Elvis Presli NBC telekanalining 68 Comeback Special ko‘rsatuvida chiqqanida taqqan kamarning aynan nusxasi.

Sofiya Koppola — “Tarjima mashaqqati” (2003)

Skarlett Yoxanssonning “Tarjima mashaqqati” filmida Sharlotta rolini o‘ynaganida kiygan liboslarning ba’zilari loyiha rejissyori va ssenariy muallifi Sofiya Koppolaning garderobidan olingan. Bu haqda Skarlett intervyularining birida aytib o‘tgan. Aktrisaning boshqa kiyimlari esa A.P.C., Agnes B va boshqa fransuz brendlari buyumlaridan iborat edi.

Julia Roberts — “Notting Hill” (1999)

“Notting Hill”dagi bir sahnada Juliyaning personaji — Gollivud superyulduzi Anna Xyu Grant qahramoniga u oddiy yigitning sevgisini izlayotgan “shunchaki qiz” ekanligini aytadi. Ushbu epizod uchun tanlangan kostyum aktrisaga yoqmaydi va u haydovchisidan o‘zining garderobidan kiyim olib kelishini so‘raydi. 

Men haydovchimga “shkafimdan buni, buni, buni olib kel”, dedim. Qahramonim kiygan yoqimli ko‘k baxmal yubka, futbolka va ko‘k kardigan o‘zimning kiyimlarim edi”, deb eslaydi Roberts.

Ledi Gaga — “Yulduz tug‘ildi” (2018)

Ledi Gaganing “Yulduz tug‘ildi” filmidagi obrazi buyurtma asosida tayyorlangan aksessuarlar, vintaj liboslar va xonandaning shaxsiy buyumlaridan iborat edi. Film liboslari dizayneri Erin Benachening aytishicha, qo‘shiqchi-aktrisaning shaxsiy garderobidagi buyumlardan biri ovoz yozish studiyasi sahnasida qo‘llanilgan rangli nakidka bo‘lgan.