Xorazm viloyati Urganch tumani hokimligining yer uchastkalarini berish masalalari bo‘yicha sobiq komissiyasi mansabdorlariga nisbatan jinoyat ishi qo‘zg‘atildi. Bu haqda viloyat prokuratura matbuot xizmati xabar berdi.
Qayd etilishicha, komissiya mansabdorlari sug‘oriladigan qishloq xo‘jaligi yerlari maxsus muhofazaga olinib, ushbu yerlarni qishloq xo‘jaligidan boshqa maqsadlarda ajratilishiga yo‘l qo‘yilmasligi qat’iy belgilangan bo‘lsa-da, 41 ball bonitetli 1,5 gektar sug‘oriladigan ekin yer maydonini savdo va maishiy xizmat ko‘rsatish shoxobchalari qurilishi uchun ajratib berish to‘g‘risida Urganch tumani hokimining noqonuniy qarori qabul qilinishiga erishgan.
Bu bilan ular jami 1,5 gektar ekin yerlarini oborotdan chiqartirgan holda, yer berish tartibini buzib, davlat va jamoat manfaatlariga jiddiy ziyon yetkazganlikda gumonlanmoqda.
Shuningdek, 15 ming kvadrat metr qurilishi tugallanmagan noturar joy obektining qishloq xo‘jaligiga mo‘ljallangan yer maydonlarida joylashgani hamda Urganch shahrining bosh rejasiga muvofiq, yo‘l hududida obektlar joylashtirib bo‘lmasa-da obyektning ixtisosini o‘zgartirishga noqonuniy ruxsatnoma berilgan.
Oqibatda, mazkur 14,2 ming metr yer maydonlarida turar-joylar qurilib, sotib yuborilib, davlat va jamoat manfaatlariga jiddiy ziyon va ko‘p miqdordagi 756,5 million so‘m zarar yetkazilgan.
Ushbu holatlar bo‘yicha Urganch tumani hokimligining yer uchastkalari berish masalalarini ko‘rib chiqish bo‘yicha sobiq komissiya mansabdor shaxslari, tuman qurilish bo‘limi sobiq boshlig‘i hamda boshqalarga nisbatan Jinoyat kodeksining 205-moddasi (hokimiyat yoki mansab vakolatini suiiste’mol qilish) 2-qismi “a” bandi va 229-4-moddasi (yer berish tartibini buzish) 2-qismi “b” bandi bilan jinoyat ishi qo‘zg‘atilgan.
Mazkur jinoyat ishi bo‘yicha viloyat prokuraturasi tomonidan tergov harakatlari olib borilmoqda.
Avvalroq Sirdaryo viloyati Sayxunobod tumani hokimining qishloq va suv xo‘jaligi masalalari bo‘yicha o‘rinbosari qishloq xo‘jaligi mahsulotlari yetishtirish bilan shug‘ullanmoqchi bo‘lgan tadbirkorga qo‘shni Sardoba tumani hududidan 6 gektar yer maydoni olib berish evaziga pul talab qilgani uchun qo‘lga olingan edi.
Izoh (0)