Урганч тумани қурилиш бўлими собиқ бошлиғига нисбатан жиноят иши қўзғатилди

Хоразм вилояти Урганч тумани ҳокимлигининг ер участкаларини бериш масалалари бўйича собиқ комиссияси мансабдорларига нисбатан жиноят иши қўзғатилди. Бу ҳақда вилоят прокуратура матбуот хизмати хабар берди.

Қайд этилишича, комиссия мансабдорлари суғориладиган қишлоқ хўжалиги ерлари махсус муҳофазага олиниб, ушбу ерларни қишлоқ хўжалигидан бошқа мақсадларда ажратилишига йўл қўйилмаслиги қатъий белгиланган бўлса-да, 41 балл бонитетли 1,5 гектар суғориладиган экин ер майдонини савдо ва маиший хизмат кўрсатиш шохобчалари қурилиши учун ажратиб бериш тўғрисида Урганч тумани ҳокимининг ноқонуний қарори қабул қилинишига эришган.

Бу билан улар жами 1,5 гектар экин ерларини оборотдан чиқартирган ҳолда, ер бериш тартибини бузиб, давлат ва жамоат манфаатларига жиддий зиён етказганликда гумонланмоқда.

Шунингдек, 15 минг квадрат метр қурилиши тугалланмаган нотурар жой обектининг қишлоқ хўжалигига мўлжалланган ер майдонларида жойлашгани ҳамда Урганч шаҳрининг бош режасига мувофиқ, йўл ҳудудида обектлар жойлаштириб бўлмаса-да объектнинг ихтисосини ўзгартиришга ноқонуний рухсатнома берилган.

Оқибатда, мазкур 14,2 минг метр ер майдонларида турар-жойлар қурилиб, сотиб юборилиб, давлат ва жамоат манфаатларига жиддий зиён ва кўп миқдордаги 756,5 миллион сўм зарар етказилган.

Ушбу ҳолатлар бўйича Урганч тумани ҳокимлигининг ер участкалари бериш масалаларини кўриб чиқиш бўйича собиқ комиссия мансабдор шахслари, туман қурилиш бўлими собиқ бошлиғи ҳамда бошқаларга нисбатан Жиноят кодексининг 205-моддаси (ҳокимият ёки мансаб ваколатини суиистеъмол қилиш) 2-қисми “а” банди ва 229-4-моддаси (ер бериш тартибини бузиш) 2-қисми “б” банди билан жиноят иши қўзғатилган.

Мазкур жиноят иши бўйича вилоят прокуратураси томонидан тергов ҳаракатлари олиб борилмоқда.

Аввалроқ Сирдарё вилояти Сайхунобод тумани ҳокимининг қишлоқ ва сув хўжалиги масалалари бўйича ўринбосари қишлоқ хўжалиги маҳсулотлари етиштириш билан шуғулланмоқчи бўлган тадбиркорга қўшни Сардоба тумани ҳудудидан 6 гектар ер майдони олиб бериш эвазига пул талаб қилгани учун қўлга олинган эди.