Afsonaviy xonanda Maykl Jekson pop madaniyatida yorqin iz qoldirdi. Yulduz 2009-yil 25-iyun kuni 50 yoshida hayotdan ko‘z yumdi.
Uning yaqinlari pop-qirol vafotining 15 yilligi munosabati bilan Maykl Jekson xotirasiga hurmat bajo keltirdi. Jeksonning o‘g‘li, akalari va jiyani ijtimoiy tarmoqlarda umumiy heshteg ostida Jeksonni yodga oldi.
Maykl vafot etganida xonandaning to‘ng‘ich o‘g‘li Jozef Jekson 12 yoshli o‘smir edi. U ijtimoiy tarmoqdagi sahifasida 1993-yilda Super Bowl XXVII shousida bolalar bilan birga chiqish qilganda tabassum qilayotgan otasi suratini joylashtirdi.
“Sizni sog‘indik. Siz bilan bu dunyo yanada go‘zal bo‘lgan edi”, — deb yozdi pop qirolining 27 yoshli o‘g‘li.
Foto: People
Marhum xonandaning akasi, 73 yoshli Jeki Jekson ham ukasi Mayklni xotirlab, ijtimoiy tarmoqda o‘z his-tuyg‘ulari bilan bo‘lishdi:
“Sensiz 15 yil vaqt o‘tib ketganiga ishonish qiyin. Biz seni har kuni sog‘inamiz”, — deb post qoldirdi Jeki.
Pop-yulduzning 70 yoshli akasi Tito ham ukasini yodga oldi va uning portreti ostida “Maykl Jeksonsiz 15 yil”, “Juda tez o‘tdi”, “Har doim qalbimizda”, “Sog‘indim”, “Izoh yo‘q” heshteglarini qo‘ydi.
Titoning 45 yoshli o‘g‘li Tijey (TJ) ham marhum amakisiga hurmat bajo keltirdi:
“Men sizni juda sog‘indim Maykl amaki. Men uchun qilgan barcha yaxshiliklaringiz uchun rahmat. Siz men uchun abadiy kuch, to‘g‘ri yo‘l ko‘rsatuvchi va ezgulik manbai bo‘lgansiz. Men doimo o‘zimni eng baxtli jiyan sifatida his qilganman. Biz sizni abadiy yaxshi ko‘ramiz”, — deb yozdi Tidjey.
Afsonaviy qo‘shiqchining o‘lim sababi hanuz noma’lum. Ba’zi taxminlarga ko‘ra, u propofolning me’yordan ortiq dozasi tufayli jon bergan. Inyeksiyaning noto‘g‘ri dozasini Jeksonning shaxsiy kardiologi yuborgan.
Maykl Jekson haqidagi biopik film tez orada muxlislarga havola etiladi, unda bosh rolni qo‘shiqchining jiyani Jaafar Jekson ijro etadi. Film namoyishi 2025-yil 18-aprelda bo‘lishi kutilmoqda. Film prodyuseri Grem King, ssenariy muallifi esa Jon Logandir. Film rejissyor Antuan Fukua (“Adolat tarafdori”, “Ajoyib yettilik”) tomonidan suratga olinadi.
Izoh (0)