Nigerda terrorchi guruhlar 25-iyun kuni xavfsizlik kuchlari joylashgan obyektga hujum qilib, 21 kishining o‘limiga sababchi bo‘lgan. Bu haqda mamlakat mudofaa vazirligi tarqatgan maʼlumotga asoslanib, Al Arabiya xabar berdi.
Mamlakat g‘arbida yuz bergan hujumda 20 nafar xavfsizlik xizmati halok bo‘lgan. Shuningdek, yana bir nafar tinch aholi vakili daydi o‘q kelib tegishidan vafot etgan.
Hujum yuz bergan Tassiya qishlog‘ida xavfsizlik choralari kuchaytirilgan. 9 nafar jarohatlanganlar markaziy kasalxonalarga olib ketilgan. Mudofaa vazirligi Nigerda uch kunlik motam eʼlon qilgan.
Milliy televideniye orqali tarqatilgan bayonotda qurolli hujumni terrorchi guruhlar koalitsiyasi tashkil etgani aytilgan. Ushbu xabar hukumatga qarshi kayfiyatdagi radikal va demokratik kuchlar birlashuvini ifoda etishi mumkin. Hukumat esa bu guruhlarni ommaviy tarzda “terrorchi” deb atagan.
Harbiylar voqeadan ko‘p o‘tmay, aksilterror operatsiya tashkil etgan. Bir necha o‘nlab hujum ishtirokchilari o‘ldirilgan. Qochib ketgan jangarilarni qidirish uchun havo va quruqlikdagi qo‘shimcha kuchlar safarbar etilgan.
Mudofaa vazirligi jangarilarga qarshi xatti-harakatini “suverenitet uchun kurash” deya baholagan. Xavfsizlik kuchlari ushbu operatsiyada qatʼiyat bilan davom etishi bildirilgan.
Hujumga uchragan Tassiaya aholi punkti Mali va Burkina-Faso bilan chegaradosh Tillaberi mintaqasida joylashgan. Niger rasmiylari aytishicha, u yerda Al-Qoida va ISHIDga aloqador isyonchilar qariyb o‘n yil davomida qonli qo‘zg‘olon olib borishmoqda.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)