Isroil havo kuchlari 24-iyun kuni G‘azo markaziga bergan zarbalari oqibatida kamida 11 nafar falastinlik halok bo‘lgan. Bu haqda Al Arabiya nashri xabar berdi.
Manbada aytilishicha, Isroil kuchlari turli hududlarda seriyali hujumlar tashkil etgan. Birinchi hujum G‘azo shahridagi Shati tarixiy qochqinlar lageri yaqinida kuzatilgan. Isroil samolyotlari oziq-ovqat tarqatish markaziga zarba bergan.
Lagerga hujumda 3 kishi halok bo‘lgani tasdiqlangan. O‘nlab odamlar jarohatlangan. Rasmiylar ko‘plab fuqarolar vayrona ostida qolganini maʼlum qilgan.
Ikkinchi hujum Bani Suhayla shahri yaqinida ro‘y bergan. Yo‘l bo‘yida turgan yuk mashinalariga hujum qilinishi oqibatida 8 kishi voqea joyida halok bo‘lgan.
Rasmiylar qurbonlar barchasi tinch aholi vakillari ekanligini, ular orasida HAMAS askarlari yo‘q ekanligini xabar bergan. Isroil o‘z havo kuchlarining G‘azo markaziga hujum uyushtirgani haqidagi xabarni rad etgan.
G‘azo Sog‘liqni saqlash vazirligining maʼlum qilishicha, tunda G‘azo shahridagi tibbiy klinikaga Isroil havo hujumi natijasida G‘azo tez yordam va favqulodda vaziyatlar departamenti direktori halok bo‘lgan. Isroil harbiylari esa ushbu hujumda HAMASning yuqori martabali qo‘mondoni Muhammad Saloh halok bo‘lganini aytgan.
Izoh (0)