Rossiya qiruvchi samolyoti 14-iyun kuni Shvetsiya havo hududini buzib o‘tgan. Bu haqda Stokgolmdagi manbalarga asoslanib, Reuters xabar berdi.
Manbada aytilishicha, Rossiya samolyoti juma kuni Boltiqbo‘yi hududidagi Gotland oroli sharqida Shvetsiya havo hududini buzgan. Bunga javoban Shvetsiya harbiylari hududga ikkita qiruvchi samolyot yuborgan.
Shvetsiya qiruvchi samolyotlari uchuvchilari Rossiya samolyotiga signal yuborib, hududni zudlik bilan tark etishga chaqirgan. Uchuvchi signallarga javob bermagan.
Havo hududini buzgan rus samolyoti SU-24 qiruvchisi bo‘lgan. Uni hududdan haydab chiqarish uchun Stokgolm maʼmuriyati Gripen samolyotlaridan foydalangan.
“Rossiyaning xatti-harakatlari qabul qilib bo‘lmasdir. Bu bizning hududiy yaxlitligimizga hurmatsizlikdan dalolat beradi”, — degan Shvetsiya havo kuchlari qo‘mondoni Yonas Vikman.
Maʼlumotlarga ko‘ra, 14-iyun kuni Shvetsiya armiyasi NATOdagi ittifoqchilari bilan Boltiqbo‘yidagi harbiy mashg‘ulotlarda qatnashayotgan bo‘lgan. Rossiya bu mashqlar o‘z hududiga tahdid tug‘dirishi haqida signal berish uchun qiruvchi samolyotlarni hududga uchirgani taxmin qilingan.
Rossiya samolyotlari tomonidan Shvetsiya havo hududini buzish holati oxirgi marta 2022-yilda kuzatilgan edi. O‘sha yili ikkita SU-27 va ikkita SU-24 samolyotlari Gotland yaqinda Stokgolm nazorat chizig‘idan o‘tgan.
G‘arb tahlilchilari rus samolyotlar havoga ko‘tarilishini Shvetsiyaga yaqin Rossiyaning Kaliningrad viloyatiga to‘g‘ridan-to‘g‘ri tahdid yuzaga kelgani bilan izohlagan. NATO harbiy mashg‘ulotlari ham Kaliningraddan uncha uzoq bo‘lmagan hududda amalga oshirilgan.
Shvetsiya rasmiylari Rossiyaning harakati nafaqat Shvetsiyaning, balki u aʼzo bo‘lgan NATOning xavfsizligiga tahdid ekanini bildirgan. Kreml bayonotlarga javob bermagan.
Izoh (0)