Davlat xavfsizlik xizmati xodimlari tomonidan Toshkent shahri, Andijon va Farg‘ona viloyatlarida haj ziyoratiga noqonuniy yuborishni vaʼda qilgan shaxslar qo‘lga olindi.
Qayd etilishicha, Chilonzor tumanida o‘tkazilgan tezkor tadbirda, 58 va 56 yoshli aka-uka o‘zaro til biriktirib, yuqori lavozimda ishlovchi tanishlari orqali ikki nafar fuqaroning Saudiya Arabistoniga haj safariga borishlari uchun talab etiladigan viza hujjatlarini tayyorlab berish va ularni ziyoratga yuborish evaziga 12 ming dollar olgan vaqtlarida ashyoviy dalillar bilan ushlangan.
Tergovga qadar tekshiruv davomida, ushbu noqonuniy ishga Toshkent shahridagi sayyohlik firmasining muqaddam firibgarlik jinoyatlari uchun ikki marotaba sudlangan ijrochi direktori aloqador ekanligi maʼlum bo‘lgan.
Andijon viloyatining Izboskan tumanidagi sayyohlik firmasi xodimi mazkur tumanda istiqomat qiluvchi fuqaroni aldov yo‘li bilan ishonchiga kirib, uni va onasini joriy haj mavsumida muborak safarga yuborish evaziga 15 ming dollar talab qilgan. U so‘ralgan pul mablag‘idan 7 ming dollarini olgan vaqtida DXX va Bosh prokuratura huzuridagi departament xodimlari tomonidan ushlangan. Shuningdek, u mazkur noqonuniy ishni sayyohlik firmasi rahbari bilan kelishgan holda amalga oshirgani aniqlangan.
Farg‘ona viloyatining Bag‘dod tumanida yashovchi 34 yoshli shaxs ijtimoiy tarmoqlar orqali fuqarolarni 8,7 ming dollar evaziga haj ziyoratiga jo‘natishini aytib, Buvayda tumanida istiqomat qiluvchi 43 yoshli fuqaro va uning 65 yoshli onasini hoji maqomini olishlari uchun Saudiya Arabistoniga yuborish evaziga 17,4 ming dollar talab qilgan. U so‘ralgan pul mablag‘idan 10 ming dollarni olgan vaqtida Davlat xavfsizlik xizmati va ichki ishlar organlari xodimlari tomonidan ushlangan.
Marg‘ilon shahrida faoliyat yurituvchi sayyohlik firmasi rahbari esa Qo‘shtepa tumanida yashovchi fuqaroni haj amallarini bajarishi uchun Saudiya podshohligiga yuborish evaziga 14 ming dollar talab qilib, oldindan 10 ming dollar olgan vaqtida ushlangan.
Hozirda mazkur shaxslarga nisbatan jinoyat ishlari qo‘zg‘atilib, tergov harakatlari olib borilmoqda.
O‘zbekistonda haj mavsumi 2024-yil 23-maydan boshlandi. Respublikadan Saudiya Arabistoniga 7-iyunga qadar har kuni aviaqatnovlar amalga oshiriladi. O‘zbekiston fuqarolari uchun umumiy haj kvotasi 15 ming nafar etib belgilandi.
Izoh (0)