Uzbekistan Airways tomonidan Haj-2024 mavsumiga 124 ta charter yo‘lovchi parvozlari amalga oshirilishi rejalashtirilgan. Bu haqda kompaniya axborot xizmati rahbari Dilorom Kaimbayeva ma’lum qildi.
Qayd etilishicha, Haj-2024 dasturi doirasidagi barcha aviaqatnovlar Boeing 767 samolyotlarida amalga oshiriladi.
Respublika aeroportlarida ro‘yxatdan o‘tish vaqtida yo‘lovchilar issiq nonushta bilan ta’minlanadi. Parvoz davomida esa O‘zbekiston Musulmonlari idorasi talablarini inobatga olgan holda tayyorlangan maxsus taomlar tarqatiladi.
Bundan tashqari, Uzbekistan Airways Sales filiali tomonidan O‘zbekistondan Saudiya Arabistoniga ziyoratchilarni olib borish davrida kassirlarning kecha-yu kunduz ishlashi tashkil etilgan.
Eslatib o‘tamiz, O‘zbekistonda haj mavsumi 2024-yil 23-maydan boshlanadi. Respublikadan Saudiya Arabistoniga 7-iyunga qadar har kuni aviaqatnovlar amalga oshiriladi.
Mamlakatning 10 ta hududiy aeroportidan to‘g‘ridan to‘g‘ri:
- Toshkent—Madina,
- Buxoro—Madina,
- Namangan—Madina,
- Farg‘ona—Madina,
- Samarqand—Madina,
- Qarshi—Madina,
- Termiz—Madina,
- Urganch—Madina,
- Nukus—Madina
- Navoiy—Madina aviareyslari orqali ziyoratchilar haj safariga kuzatiladi.
O‘zbekiston fuqarolari uchun umumiy haj kvotasi 15 ming nafar etib belgilandi.
Izoh (0)