Rossiya kuchlari 12-iyun kuni Ukrainadagi Krivoy Rog shahriga zarba berishi oqibatida kamida 9 kishi halok bo‘ldi, 29 kishi jarohatlandi. Bu haqda The Kyiv Independent nashri xabar berdi.
Chorshanba kuni Rossiya Dnepropetrovsk viloyati markazidagi Krivoy Rog shahriga raketa zarbalari yo‘llagan. Ukraina Bosh prokuraturasi xabarni tasdiqlagan.
Jarohatlanganlarning besh nafari bolalar ekanligi xabar berilgan. Ular chuqur jarohatlar bilan kasalxonaga joylashtirilgan.
Hujumda qo‘llangan raketa va qurbonlar shaxsi haqida qo‘shimcha maʼlumotlar hozircha oshkor etilmagan. Rasmiylar hududda tekshiruv davom etayotganini bildirgan.
“Politsiya Rossiyaning navbatdagi harbiy jinoyatini hujjatlashtirmoqda”, — deyilgan Ukraina ichki ishlar vaziri Igor Klimenko bayonotida.
Dnepropetrovsk viloyati gubernatori Sergey Lisak Krivoy Rogda asosan turar joy binolariga raketa hujumi sodir etilganini aytgan. Kelgusidagi hujumlarga qarshi turish uchun viloyat rahbari shaharda havo hujumiga qarshi mudofaa inshootlari qurilishi haqida maʼlum qilgan.
“Halok bo‘lganlarning oila aʼzolari va yaqinlariga hamdardlik bildiraman”, — degan prezident Vladimir Zelenskiy hodisa yuzasidan munosabat bildirib.
Izoh (0)