Armaniston bosh vaziri Nikol Pashinyan Qorabog‘dagi urush haqidagi so‘zlari uchun Belarus prezidenti Aleksandr Lukashenkodan uzr so‘rashni talab qildi. Holat yuzasidan Belarus mamlakatdagi Armaniston elchisini chaqirib oldi. Bu haqda Sputnik xabar berdi.
Pashinyan Belarusga Lukashenko rahbarlik qilar ekan, u yerga hech qachon bormasligini aytgan. Bunga sabab sifatida u Belarus prezidentining Qorabog‘ haqidagi so‘zlarini keltirgan. May oyining oxirida Aleksandr Lukashenko Ozarbayjonga tashrifi chog‘ida Bokuning Qorabog‘ uchun olib borayotgan urushini “ozodlik uchun” deb atagandi.
Men sizning ozodlik urushingizdan oldingi suhbatimizni, tushlik paytida birga falsafiy suhbatlashganimizni esladim. O‘shanda urushda g‘alaba qozonish mumkin, degan xulosaga kelgandik. Bu muhim, urushda g‘alaba qozonish mumkin, — degan edi Lukashenko.
Shundan so‘ng, may oyida Pashinyan Ozarbayjonning Qorabog‘dagi urushga tayyorgarligida KXSHTga a’zo ikki davlat ishtirok etganini aytgandi.
Bizning ittifoqchilarimiz 44 kunlik urushni tayyorlashda qatnashgan, men KXSHTga aʼzo bo‘lgan kamida ikkita davlatni bilaman, ular bizga qarshi urush tayyorlashda qatnashgan, — degan Pashinyan.
Armaniston bosh vazirining yangi bayonotiga ko‘ra, KXSHT doirasidagi munosabatlarda, Belarus tashkilotdan chiqsa yoki Lukashenko armanlardan uzr so‘rasa, nazariy jihatdan o‘zgarishlar kuzatilishi mumkin.
“KXSHT aʼzolaridan biri 44 kunlik urushga tayyorgarlik ko‘rishda ishtirok etganini, Ozarbayjonga g‘alaba tilaganini, unga ishonganini eʼlon qildi. Shundan keyin Belarus prezidenti bilan KXSHT formatida qanday qilib muhokama olib borish kerak? Aleksandr Lukashenko prezident ekan, Belarusga boshqa hech qachon tashrif buyurmasligimni aytmoqchiman va Armanistonning birorta ham rasmiy vakili tashrif buyurmaydi”, — degan u.
Pashinyan tashkilotga aʼzolikni muzlatishdan keyingi mantiqiy qadam Armanistonning KXSHTdan chiqishi bo‘lishini ta’kidlagan.
“Keyingi mantiqiy qadam Armanistonning KXSHTdan chiqishi bo‘ladi... Bu qachon sodir bo‘lishi, balki bir oy, bir yil, uch yildan keyin o‘zimiz hal qilamiz”, — degan Armaniston bosh vaziri.
Izoh (0)