Самарқандда фуқароларга нисбатан жисмоний куч ишлатган ички ишлар органи ходими ишдан бўшатилди

Самарқандда фуқароларга нисбатан амалдаги қонунчиликка зид равишда жисмоний куч ишлатган ходим тизимдан бўшатилди. Бу ҳақда Самарқанд вилояти Ички ишлар бошқармаси ахборот хизмати хабар берди.

Маълум қилинишича, 9 июнь куни жамоат тартибини сақлаш, фуқароларнинг хавфсизлигини таъминлаш мақсадида тунги хизматга жалб қилинган Самарқанд шаҳар бўйича ИИО ФМБ профилактика инспектори С.Эшонқулов соат 22:00 ларда Самарқанд шаҳар Даҳбет кўчасидаги автомобиль йўлининг қатнов қисмида фуқаролар жанжал қилаётганини кўрган. 

Ходим уларни 6-сон ИИБга олиб борган, фуқароларнинг содир этган қилмишини расмийлаштириши давомида профилактика инспектори  ва ушбу шахслар ўртасида келишмовчилик юзага келган. 

Жараёнда профилактика инспектори икки нафар фуқарога нисбатан (улардан бири аёл) амалдаги қонунчиликка зид равишда жисмоний куч ишлатган.

Ҳолат юзасидан хизмат текшируви ўтказилиб, профилактика инспектори С.Эшонқулов ички ишлар органлари сафидан бўшатилган.

Тўпланган ҳужжатлар иштирокчиларнинг ҳаракатларига ҳуқуқий баҳо бериш учун прокуратура органларига юборилган.