Germaniya hukumati Ukraina uchun 500 million yevro miqdorida yangi yordam paketi ajratadi. Bu haqda Germaniya Mudofaa vazirligi eʼlon qilgan xabarga asoslanib, The Kyiv Independent nashri xabar berdi.
Manbada aytilishicha, Germaniya mudofaa vaziri Boris Pistorius 30-may kuni Ukrainaning Odessa shahriga eʼlon qilinmagan tashrif bilan kelgan. Shahar maʼmuriyati binosida o‘tkazilgan uchrashuvda vazir yangi moliyaviy paket haqida eʼlon qilgan.
Pistorius uchrashuvda G‘arb mamlakatlariga ham murojaat qoldirgan. U Rossiya ichidagi harbiy nishonlarga qarshi G‘arb tomonidan taqdim etilgan qurollardan foydalanishga qo‘yilgan cheklovlarni bekor qilishga chaqirgan. Sharqiy frontda Ukrainaga maksimal erkinlik berishga chaqirgan.
Mudofaa vaziri yangi harbiy yordam paketi Iris-T havo mudofaa tizimlari, qisqa masofali SLS raketalari uchun o‘q-dorilar, shuningdek, razvedkachi dronlar, 1 million o‘q-dorilar, Leopard 1 jangovar tanklari hamda Marder zirhli mashinalarini o‘z ichiga olishini aytgan.
Germaniya rasmiysi Berlin Ukrainaga artilleriya tizimlari va Leopard jangovar tanklari uchun ehtiyot qismlar ham yuborishini bildirgan. Ushbu qismlarning ayrim to‘plamlari allaqachon jo‘natish uchun shay holatda ekani xabar qilingan.
“Biz sizni ushbu mudofaa kurashida qo‘llab-quvvatlashda davom etamiz”, — degan Germaniya mudofaa vaziri ukrainalik hamkasbi Rustem Umerov bilan uchrashuvda.
Izoh (0)