Jennifer Lopes va Ben Afflek ajralish arafasida ekani haqida bir nechta xorijiy tabloidlar o‘z manbalariga asoslanib yozmoqda.
Er-xotin uzoq vaqt davomida birga ko‘rinmagan
People nashrining ta’kidlashicha, Jennifer Lopes va Ben Afflek taxminan 7 haftadan beri omma oldida ko‘rinmaydi. Ularni oxirgi marta 31-mart kuni Nyu-Yorkda tushlik qilayotganlarida ko‘rishgan.
Met Gala’da ham Jennifer yolg‘iz edi — xonanda juda ozg‘in va charchagan ko‘rinardi, bu, albatta, internetda qizg‘in muhokamalarga sabab bo‘ldi. Bir kun oldin paparatssilar Lopesni raqs studiyasiga Affleksiz ketayotganini kadrlarga muhrlagan edi. Umuman olganda, bu dalil bo‘lolmaydi, lekin ajralish haqidagi mish-mish bolalagan bir paytda bu fakt muxlislarni xavotirga soldi.
Aytishlariga qaraganda, Ben ish bilan juda band — u “Gladiator-2” filmini suratga olayotgani uchun Met Gala’ga ham kela olmagan.
Afflek sevgilisinikidan ketgan, Lopes esa yangi uy qidirmoqda
InTouch bilan suhbatlashgan manbaning fikricha, juftlik ikki yillik turmushidan keyin yana ajralishga tayyorlanmoqda. Ta’kidlanishicha, Afflek yaqinda Beverli-Xillzdagi 60 million dollarlik uyidan ko‘chib ketgan.
“Ben uydan allaqachon ko‘chib ketgan — endi ular ikki yil davomida qidirgan orzudagi uylarini sotishlariga to‘g‘ri keladi. Hozirda Ben ishi va bolalariga ko‘proq e’tibor qaratgan. Ular hech qachon bir-birlarini sevishdan to‘xtamaydi, lekin Lopes erini boshqarolmaydi, Ben ham xotinini o‘zgartirolmaydi. Bu uzoq davom etishi mumkin emas”, — deydi nashr manbasi. Uning qo‘shimcha qilishicha, bu safar Ben “aybdor emas”.
Bundan tashqari, Afflek 16-may kuni Los-Anjelesdagi uylaridan biridan chiqib ketayotganida kamera obyektiviga tushib qolgan — aktyor u yerda tunab qolgan, deb taxmin qilinyapti. Aytishlariga qaraganda, aktyor allaqachon boshqa uyga ko‘chib o‘tgan.
Bundan tashqari, TMZ’ning yozishicha, katta ehtimol bilan, Lopes ham yangi uy qidirmoqda. Boshqa bir kuni qo‘shiqchini ishdagi hamkori Eleyn Goldsmit-Tomas hamrohligida Beverli-Xillzdagi qasrdan chiqib ketayotganini ko‘rishgan.
Lopes nosog‘lom munosabatlar haqidagi postga layk bosgan
Instagram’dagi o‘sha postda umr yo‘ldoshning nosog‘lom munosabatlarga olib kelishi mumkin bo‘lgan fazilatlari tasvirlangan. “Vaqtingizni hurmat qilmaydigan, o‘zini qadrlamaydigan, halollik va hissiy yetuklikka ega bo‘lmagan odam bilan sog‘lom munosabatda bo‘lish mumkin emas”, deyilgan. Lopes bu gaplarga layk bosgan, deydi PageSix.
Jey Lo suratga oldirgan hujjatli film
Aytishlaricha, mojaro qo‘shiqchining fevral oyida Amazon Prime’da chiqqan “Hech qachon aytilmagan buyuk sevgi hikoyasi” hujjatli filmi tufayli boshlangan.
Ta’kidlanishicha, Ben shaxsiy daxlsizlikni xohlagan — Jennifer ko‘pincha uni ijtimoiy tadbirlarda qatnashishga majburlagan, shaxsiy munosabatlari haqida ochiq-oydin intervyular bergan. Bundan tashqari, u film ijodkorlariga Benning unga yozgan maktublarini ko‘rsatgan.
“Men unda haqiqatan ham go‘zallik, she’riyatni ko‘rganman, bu hech qachon aytilmagan eng buyuk sevgi hikoyasi edi. Ammo uni suratga olayotgan ekansiz, bu uning allaqachon aytib bo‘linganini anglatadi”, — degan aktyor. Aynan shu epizod filmga kiritilgan.
Jennifer Lopes va Ben Afflek 2002-yilda uchrasha boshlagan. Juftlik muxlislar va ommaviy axborot vositalarida shu qadar mashhur ediki, ularni tez orada Bennifer deb atay boshlashadi.
Ular ilk bor 2002-yilda unashtirilgan, biroq to‘yni keyinga qoldirishga to‘g‘ri kelgan. 2004-yilda esa Lopes va Afflek ajrashishga qaror qilgan. Yulduzlar 2021-yilda yana topishishdi, 2022-yil aprelida esa ularning unashtirilgani maʼlum bo‘ldi.
Izoh (0)