Toshkent shahar hokimi Shavkat Umurzoqov Sankt-Peterburg shahri vitse-gubernatori Oleg Ergashev boshchiligidagi delegatsiya bilan uchrashuv o‘tkazdi. Bu haqda hokimlik matbuot xizmati xabar berdi.
Maʼlum qilinishicha, Toshkent shahri hokimi mehmonlarni qarshi olar ekan tashrif uchun minnatdorlik bildirib, ikki davlat rahbarlarining ochiqlik siyosati natijasida Toshkent shahri bilan Rossiya Federatsiyasining hududlari o‘rtasida keng ko‘lamli hamkorlikni yo‘lga qo‘yish imkoniyati yaratilganini aytib, bu imkoniyatdan to‘laqonli foydalanish zarurligini taʼkidladi.
Iqtisodiyot, investitsiyalar, biznes, sanoat sohalari bilan bir qatorda ijtimoiy sohalarda ham hamkorlikni, o‘zaro tajriba almashinuvini kengaytirish maqsadga muvofiqligini qayd etdi.
Sankt-Peterburg shahri vitse-gubernatori Toshkent shahrida bo‘lib turganidan xursandligini va istiqbolda ko‘plab yangi loyihalar orqali hamkorlik qilish taklifini bildirdi. Jumladan, yaqin kunlarda rossiyalik pediatriya, onkologiya sohasi mutaxassislari O‘zbekistonga o‘z tajribalari bilan o‘rtoqlashish uchun yuborilishi maʼlum qildi.
Uchrashuv yakunida taraflar samarali hamkorlik uchun muloqotni davom ettirishga kelishib oldi.
Izoh (0)