Тошкент шаҳар ҳокими Шавкат Умурзоқов Санкт-Петербург шаҳри вице-губернатори Олег Эргашев бошчилигидаги делегация билан учрашув ўтказди. Бу ҳақда ҳокимлик матбуот хизмати хабар берди.
Маълум қилинишича, Тошкент шаҳри ҳокими меҳмонларни қарши олар экан ташриф учун миннатдорлик билдириб, икки давлат раҳбарларининг очиқлик сиёсати натижасида Тошкент шаҳри билан Россия Федерациясининг ҳудудлари ўртасида кенг кўламли ҳамкорликни йўлга қўйиш имконияти яратилганини айтиб, бу имкониятдан тўлақонли фойдаланиш зарурлигини таъкидлади.
Иқтисодиёт, инвестициялар, бизнес, саноат соҳалари билан бир қаторда ижтимоий соҳаларда ҳам ҳамкорликни, ўзаро тажриба алмашинувини кенгайтириш мақсадга мувофиқлигини қайд этди.
Санкт-Петербург шаҳри вице-губернатори Тошкент шаҳрида бўлиб турганидан хурсандлигини ва истиқболда кўплаб янги лойиҳалар орқали ҳамкорлик қилиш таклифини билдирди. Жумладан, яқин кунларда россиялик педиатрия, онкология соҳаси мутахассислари Ўзбекистонга ўз тажрибалари билан ўртоқлашиш учун юборилиши маълум қилди.
Учрашув якунида тарафлар самарали ҳамкорлик учун мулоқотни давом эттиришга келишиб олди.
Изоҳ (0)