ДХХ Сурхондарё вилояти бошқармаси тергов бўлими томонидан “Сурхондарё сув таъминоти” АЖнинг мансабдор шахслари ва бошқаларга нисбатан жиноят иши қўзғатилган.
Маълум бўлишича, 2021 йилнинг март ойидан 2022 йилнинг февраль ойига қадар “Сурхондарё сув таъминоти” АЖ (аввалги МЧЖ) директори лавозимида ишлаган Г.Б. ташкилотга қарашли таъмирлаш-тиклаш унитар корхонаси раҳбари Р.Ж., фуқаролар М.А., Х.Б., Х.З., Х.Ш., К.З. билан тил бириктириб, жиноий гуруҳга бирлашган.
Шунингдек, 2022 йилнинг февраль ойидан 2023 йилнинг августига қадар “Сурхондарё сув таъминоти” АЖ директори лавозимида ишлаган С.Х. ҳам фуқаролар Х.З., Н.А., Н.А. билан олдиндан жиноий тил бириктириб, сохта маълумотларни расмийлаштириш орқали жамият балансидаги жуда кўп миқдордаги темир ҳамда чўян қувурларни ўзлаштириш ва растрата йўли билан талон-торож қилган.
Тергов жараёнида давлат манфаатларига 2 миллиард 82 миллион сўм миқдорида зарар етказилганлиги аниқланиб, 1 миллиард 404,5 миллион сўм қисми қайтарилиши таъминланган.
Ҳозирда Тергов бўлими томонидан ушбу шахсларга нисбатан Жиноят кодексининг 167-моддаси 3-қисми “а” банди (ўзлаштириш ёки растрата йўли билан жуда кўп миқдорда талон-торож қилиш) 209-моддаси 2-қисми “а” банди (такроран ёки хавфли рецидивист томонидан содир этилган мансаб сохтакорлиги) билан айб эълон қилиниб, терговга оид барча ҳужжатлар жиноят ишини кўриб чиқиш учун судга юборилган.
Изоҳ (0)