Буюк Британияда парламент сайловлари санаси 4 июлга белгиланган. Бу ҳақда Британия бош вазири Риши Сунак ҳукумат йиғилиши якунлари бўйича баёнот берди.
“Ҳозир Буюк Британия учун келажагини танлаш вақти келди — эришилган ютуқларга кифояланамизми ёки ҳеч қандай режа ва аниқликсиз ҳаммасини бошидан бошлаймизми, аниқлаб олишимиз керак. Бугун эрта тонгда қирол ҳазратлари билан суҳбатда мен парламентни тарқатиб юборишни сўрадим. Қирол бу илтимосни қондирди ва бизда 4 июлда умумий сайлов ўтказилади”, — деди Сунак.
Риши Сунакнинг қайд этишича, Буюк Британия сайловлари “дунёда совуқ уруш тугаганидан бери энг хавфли” бир вақтда бўлиб ўтади. Унинг сўзларига кўра, глобал хавфсизлик ва барқарорликка таҳдид Украинадаги жанглар ва Яқин Шарқда экстремизмнинг кучайиши билан боғлиқ.
“Умид қиламанки, бош вазир бўлганимдан кейинги фаолиятим бизнинг режаларимиз борлигини ва мамлакатимизни гуллаб-яшнаши учун зарур бўлган дадил ҳаракатга тайёр эканимизни кўрсатади. Мен ушбу режага содиқман ва ҳатто қийин бўлган тақдирда ҳам сиз билан доимо очиқ бўлиб келганман, чунки мен осон бўлган нарса эмас, балки мамлакатимиз учун тўғри бўлган нарсага амал қиламан”, деб қўшимча қилди Риши Сунак.
Sky News суҳбатлашган экспертларнинг фикрича, Риши Сунак Буюк Британиядаги иқтисодий вазият яхшилангани сабабли сайловларни муддатидан олдин ўтказишга қарор қилган. 2024 йил апрель ойи охирида Буюк Британияда инфляция март ойидаги 3,2 фоиздан 2,3 фоизгача пасайди, дея қайд этади Sky News. Буюк Британия иқтисодиёти 2024 йилнинг биринчи чорагида олдинги уч ойга нисбатан 0,6 фоизга ўсди. Мутахассисларнинг таъкидлашича, бу натижаларнинг барчаси Сунак жорий йилда эришмоқчи бўлган кўрсаткичларга мос келади.
Изоҳ (0)