Namangan viloyati Pop tumanida o‘tkazilgan tezkor tadbir davomida qalbaki AQSH dollarlarining savdosiga chek qo‘yildi. Bu haqda viloyat IIB axborot xizmati xabar berdi.
Qayd etilishicha, Andijon viloyati Shahrixon tumanida yashovchi muqaddam sudlangan shaxs tadbir ishtirokchisiga 100 dollarlik qalbaki kupyurani 50 dollardan hisoblab, jami 2,7 ming dollar miqdoridagi qalbaki pullarni sotgan vaqtida ashyoviy dalillar bilan ushlangan.
Shundan so‘ng, fuqaro kelgan Cobalt avtomashinasi xolislar ishtirokida ko‘zdan kechirilganda, mashina old eshigining yon qismida 100 dollarlik kupyuralardagi jami 1000 dollar, fuqaroning yonida esa 200 dollar miqdoridagi pullar borligi aniqlanib, tekshirib ko‘rish uchun olingan.
Qayd etilishicha, tekshirib ko‘rish uchun olingan pullar tayyorlash uslubi tipografiya korxonasida maxsus himoya vositasida emas, balki oddiy boshqa dastgohda tayyorlangani aniqlangan.
Mazkur holat yuzasidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) 2-qismi “a” bandi bilan jinoyat ishi qo‘zg‘atilib, ayblanuvchi qamoqqa olingan. Hozirda tergov harakatlari olib borilmoqda.
Bundan oldin Navoiy viloyati IIB TQX Jinoyat qidiruv bo‘limi, DXX Navoiy viloyati boshqarmasi va departament xodimlari bilan hamkorlikda o‘tkazilgan tezkor tadbirda jinoiy guruh tomonidan 400 million so‘m soxta pullar 160 million so‘m haqiqiy pullarga almashtirilayotgan paytda qo‘lga olingandi. Aprel boshlarida esa Toshkent shahri Yangihayot tumanida xaridor qalbaki pulga iPhone sotib olgani, Toshkent viloyati Angren shahrida qalbaki pullar muomalaga kiritilishining oldi olingani to‘g‘risida xabar berilgandi.
Izoh (0)