Tuxel “Bavariyani” tark etadi. Bosh murabbiy klub bilan kelishuvga erisholmadi

Tomas Tuxel “Bavariya” bosh murabbiyligida qolmaydigan bo‘ldi. 

Avvalroq murabbiy ushbu chempionat yakunlanganidan keyin “Bavariya”ni tark etishini aytgandi. OAVda esa Tuxel keyingi mavsumda ham klubda qolishi mumkinligi haqida xabarlar tarqaldi.

Tomas Tuxel “Bavariya”ning Bundesligadagi “Xoffenxaym”ga qarshi mavsumdagi so‘nggi o‘yini oldidan matbuot anjumanida bu haqda ma’lumot berdi.

“Bu mening klubdagi oxirgi matbuot anjumanim. Klub bilan muzokaralar olib borildi, biroq kelishuvga erisha olmadik. Shuning uchun fevral oyida e’lon qilingan dastlabki qaror o‘z kuchida qoladi”, — deya izohlaydi Tuxel.

Joriy mavsumda myunxenliklar birorta sovrin yutmadi. Ayni damda Bundesliga turnir jadvalida ikkinchi o‘rinni egallab turibdi. Birinchi o‘rindagi “Bayer” muddatidan oldin chempionlikni qo‘lga kiritdi. Tuxel nemis klubini 2023-yildan beri boshqaradi.

• Murabbiy jamoani 60 o‘yinda maydonga olib tushgan.
• Tuxel boshchiligidagi klub o‘yinlarning 37 tasida g‘alaba qozongan. O‘yinlarning 8 tasida durang qayd etib, 15 bora mag‘lubiyat alamini totib ko‘rgan.

Avvalroq myunxenliklar bosh murabbiyi faoliyatida o‘ziga xos natijani qayd etib, uchta turlicha klub bilan musobaqa yarim finaliga chiqqan ilk nemis murabbiyiga aylangani haqida xabar berilgandi.