“Daryo” reportaji: 40 kun davom etadigan xalqaro gullar festivaliga tayyorgarlik ko‘rayotgan Namangan (video)

Namanganda 63-xalqaro gullar festivaliga tayyorgarlik yakuniy bosqichga kirdi. Bu haqda “Daryo” muxbiri Azizbek Abduvaliyev xabar bermoqda.

Bu yilgi bayram tadbirlari Bobur bog‘i, “Afsonalar vodiysi” parki va “Yangi O‘zbekiston bog‘i” amfiteatrida bo‘lib o‘tishi ko‘zda tutilgan.

Festival 19-maydan boshlanadi va qariyb 40 kun davom etadi. Tadbirni anʼanaviy tarzda gullar bilan bezatilgan avtomobillar paradi boshlab beradi.

Festival doirasida modalar haftaligi, adabiyot bayrami, hunarmandlar yarmarkasi, osh chempionati, askiya va retro-qo‘shiqlar kechalari, avto va dron-shoular, shotokan-karate bo‘yicha Osiyo chempionati, etnosport musobaqalari va lavanda sayli o‘tkaziladi.

Xalqaro maqomni olgan festivalga ko‘plab o‘zbek va dunyo estradasi yulduzlarining tashrifi hamda gala-konsertlar kutilmoqda.

Festival 23-iyun kuni “Yangi O‘zbekiston bog‘i” amfiteatridagi taqdirlash marosimi bilan yakuniga yetadi.