Toshkent havosidagi PM2,5 zarralari miqdori 25-yanvar kuni JSST tavsiyalaridan qariyb 21 barobarga oshib ketdi, deb xabar bermoqda “O‘zgidromet”.
Atmosfera havosi monitoringi avtomatik stansiyalar ma’lumotlariga ko‘ra, soat 08:00 da Toshkent shahrining atmosfera havosidagi PM2,5 mayda dispersli zarrachalar miqdori 104,8 mkg/m3 ni tashkil etdi. Bu JSST tavsiyalaridan 20,9 marta ko‘p.
IQAir ma’lumotlariga ko‘ra, bu havoning “zararli” darajadagi ifloslanish toifasiga kiradi.
PM 10 dispersli zarrachalarining miqdori va uglerod oksidi CO (avtotransport va sanoat korxonalari chiqindilari) esa Sanitariya qoidalari, normalari va gigiyena normativlari bo‘yicha ruxsat etilgan me’yordan oshmadi.
Ekologiya, atrof-muhitni muhofaza qilish va iqlim o‘zgarishi vazirligi O‘zbekistonning geografik va iqlimiy xususiyatlaridan kelib chiqqan holda Jahon sog‘liqni saqlash tashkiloti ko‘rsatmalariga erishish qiyinligini ma’lum qilgandi.
Vazirlik Sog‘liqni saqlash vazirligi bilan hamkorlikda O‘zbekistonda atmosfera havosi sifati monitoringi bo‘yicha milliy platforma va mobil ilovani ishlab chiqishga qaratilgan loyihani amalga oshirmoqda.
Izoh (0)