Qashqadaryo viloyati G‘uzor tumanida tabiiy qum mahsulotini noqonuniy qazib olish holati aniqlandi, deb xabar beradi Bosh prokuratura huzuridagi departament.
Qayd etilishicha, departamentning G‘uzor tuman bo‘limi tomonidan Ekologiya va atrof-muhitni muhofaza qilish va iqlim o‘zgarishi boshqarmasi va “Xavfsiz daryo” DM xodimlari bilan hamkorlikda tezkor tadbir o‘tkazilgan. Tadbirda fuqaro B.X.“Qashqadaryo daryosining G‘uzor tumani “Zarbdor” MFY hududidan oqib o‘tuvchi muhofaza maydonidan maxsus texnikalar yordamida 3,6 ming kub noruda foydali qazilma hisoblangan tabiiy qum mahsulotini noqonuniy ravishda qazib olib, davlat va jamiyat manfaatlariga 357,7 million so‘m zarar yetkazilgani aniqlangan.
Mazkur holat yuzasidan Jinoyat kodeksining 229-moddasi (o‘zboshimchalik) bilan jinoyat ishi qo‘zg‘atilib, tergov harakatlari o‘tkazilmoqda.
Ma’lumot uchun, prezident farmoni bilan Chirchiq, Sangzor, Zarafshon, Norin, Qashqadaryo, Surxondaryo va Sirdaryo daryolari o‘zanlaridagi noruda materiallarni qazib olishga 2024-yil 1-maydan muddatsiz moratoriy joriy qilinadi. Noqonuniy qazib olish ishlari natijasida tabiatga yetkazilgan zarar uchun javobgarlik ham kuchaytiriladi.
Avvalroq Chirchiq daryosida qum-shag‘al qazib olinishi natijasida tabiatga 80 mlrd so‘mdan ortiq zarar yetkazilgani to‘g‘risida xabar berilgandi.
Izoh (0)