Ichki ishlar vazirligi “Qurol va portlovchi materiallar muomalasi sohasida davlat xizmatlari ko‘rsatilishini elektron tartibga o‘tkazilishi munosabati bilan O‘zbekiston Respublikasi Hukumatining ayrim hujjatlariga o‘zgartirish va qo‘shimchalar kiritish to‘g‘risida”gi Vazirlar Mahkamasi qarori loyihasini muhokamaga qo‘ydi.
Hujjat loyihasi bilan kiritilayotgan qo‘shimchalardan biriga ko‘ra, agar litsenziyalovchi organ litsenziya berish to‘g‘risidagi arizani ko‘rib chiqish muddati davomida litsenziya berish yoki litsenziya berishni rad etish to‘g‘risida qaror qabul qilmasa, litsenziya talabgori bu haqda litsenziyalovchi organni “Litsenziya” AT yoki YIDXP orqali elektron shaklda xabardor qiladi. Bunda, litsenziya “Litsenziya” AT yoki YIDXP orqali avtomatik ravishda rasmiylashtiriladi va talabgor ushbu nizomda nazarda tutilgan tartibda davlat bojini to‘laganidan so‘ng litsenziyalanadigan faoliyatni amalga oshirish huquqiga ega bo‘ladi.
Shuningdek, litsenziya talabgorining litsenziyani olishni kutishga roziligini bildirishi, uning keyinchalik litsenziyalovchi organni xabardor etish orqali faoliyatni amalga oshirish huquqini cheklamaydi.
Loyihaning qabul qilinishi:
- ichki ishlar organlari tomonidan litsenziya va ruxsat etish xususiyatiga ega hujjatlarni berish bilan bog‘liq davlat xizmatlari talabgor jismoniy va yuridik shaxslarga foydalanish uchun qulay bo‘lgan, soddalashtirilgan holda ko‘rsatilishiga, ularning huquqlari va qonuniy manfaatlari to‘liq tarzda ro‘yobga chiqarilishi ustidan nazorat darajasi kuchaytirilishiga;
- litsenziya va ruxsat berish tartib-taomillari to‘g‘risidagi qonunchilik hujjatlarini tizimlashtirish orqali ulardan o‘tishning yagona tartibi belgilanishiga, normativ-huquqiy hujjatlarning, talab etiladigan axborot va hujjatlarning soni qisqartirilishiga, buning natijasida ortiqcha byurokratik to‘siqlarning bartaraf etilishiga;
- tegishli davlat xizmatlarini ko‘rsatishda manfaatdor davlat organi va tashkilotlarining o‘zaro hamkorlik qilish va axborot almashinuvini amalga oshirish mexanizmi takomillashtirilishiga;
- tadbirkorlarga doir majburiy talablarni qisqartirish hamda litsenziya va ruxsat etish xususiyatiga ega hujjatlarni olish tartib-taomillarini soddalashtirishga xizmat qiladi.
O‘zbekistonda “Qurol to‘g‘risidagi” qonun 2019-yil 29-iyulda prezident tomonidan imzolangan. Fuqaroviy va xizmat quroli hamda uning o‘q-dorilarini ishlab chiqarish, ta’mirlash va realizatsiya qilish bo‘yicha faoliyat faqat O‘zbekiston hududida belgilangan tartibda ro‘yxatdan o‘tgan yuridik shaxslar tomonidan amalga oshiriladi. O‘zbekistonda noqonuniy saqlangan qurollarni o‘z ixtiyori bilan IIVga topshirganlarga pul mukofoti beriladi.
2022-yilda “Prokuratura to‘g‘risida”gi qonunga kiritilgan o‘zgartirishlarga ko‘ra, prokuratura organlari xodimlari xizmat quroli va shaxsiy himoya vositalarini qonunchilikda belgilangan tartibda saqlash, olib yurish hamda ulardan foydalanish huquqiga egaligi belgilangandi (ilgari faqatgina olib yurishi mumkinligi ko‘rsatilgan).
Izoh (0)