AQSH Milliy xavfsizlik bo‘yicha maslahatchisi Jeyk Sallivan Kiyevga tashrifi chog‘ida AQSH Kongressi Ukrainaga qo‘shimcha harbiy yordam paketini ertami-kechmi albatta maʼqullashini maʼlum qildi. Bu haqda CNN nashri xabar berdi.
Xabarda aytilishicha, Kiyevga kelgan Jeyk Sallivan Ukraina prezidenti Vladimir Zelenskiy idora rahbari Andrey Yermak bilan uchrashgan. Uchrashuvda u harbiy yordam paketi ajratilishiga qatʼiy ishonch bildirgan bo‘lsa-da, bu voqeaning aynan qachon ro‘y berishi haqida maʼlum qilmagan.
“Ishonchimiz komilki, biz Ukrainaga yordam paketi ajratish uchun Vakillar Palatasida kuchli ovozga ega bo‘lamiz va mablag‘ olishga erishamiz. Bu juda uzoq davom etishi mumkin. Men bu aniq qachon bo‘lishini bashorat qilolmayman, biroq bu amalga oshadi”, — degan Jeyk Sallivan.
O‘tgan oyda AQSH Senati Ukrainaga 60 milliard dollarlik harbiy yordam ajratishni nazarda tutuvchi qo‘shimcha qonun loyihasini maʼqullagan edi. Biroq Vakillar palatasi spikeri Mayk Jonson uni ovozga qo‘yishdan bosh tortdi.
Jeyk Sallivanning tashrifi Oq uy qo‘shimcha 300 million dollarlik harbiy yordam eʼlon qilganidan bir hafta o‘tgach sodir bo‘lmoqda. Ukraina tomoni ham, bir qator AQSH rasmiylari ham bu miqdordagi yordam hech narsaga yetmasligini maʼlum qilgan.
Izoh (0)