Toshkentda 16-may kuni milliy estrada san’ati asoschisi, O‘zbekiston xalq artisti Botir Zokirov haykali ochildi. Bu haqda Prezident matbuot xizmati xabar berdi. Tadbirda Shavkat Mirziyoyev ishtirok etib, san’at muxlislarini tabrikladi.
“Bugun o‘ziga xos san’at va madaniyat bayrami. Ushbu quvonchli voqea bilan siz, azizlarni, rahmatli Botir Zokirovning yaqinlari va muxlislarini, butun xalqimizni samimiy muborakbod etaman”, — dedi prezident.
-2Nlw_eJd.jpg)
Botir Zokirov 1936-yilda san’atkorlar oilasida tug‘ilib, voyaga yetgan. 29 yoshida O‘zbekiston xalq artisti unvoniga sazovor bo‘lgan. 2000-yilda “Buyuk xizmatlari uchun” va 2021-yilda “El-yurt hurmati” ordenlari bilan mukofotlangan.
Davlat rahbari xonandaning benazir iste’dodi va insoniy fazilatlarini e’tirof etdi.
-MgBWdD4N.jpg)
Xabarda ta’kidlanishicha, Botir Zokirov juda qisqa — 49 yil umr ko‘rgan. Lekin shu yillar davomida o‘zidan rang-barang va boy ijodiy meros qoldirgan. Dunyoning madaniyat poytaxtlarida o‘zbek san’atini zo‘r muvaffaqiyat bilan namoyish etgan.
Xonanda 1955-yilda og‘ir dardga chalingan va bir necha marta jarrohlik amaliyotlarini boshidan o‘tkazgan. Shifokorlar unga qo‘shiq aytishni taqiqlaganiga qaramay u shu ahvolda ham ijoddan, kuylashdan to‘xtamagan.
Botir Zokirov sharq folklori va zamonaviy estrada san’atini uyg‘unlashtirib, “Myuzik xoll” ijodiy jamoasini tashkil etgan, xonanda va kompozitor sifatida ko‘plab iste’dodli yoshlarga ustozlik qilgan. Respublikada xizmat ko‘rsatgan “Yalla” ansamblining tashkil topishida Botir Zokirov xizmatlari beqiyosdir.
-3W6tqGyc.jpg)
-B9zIqtS_.jpg)
“Bu haykal Botir Zokirov xotirasiga o‘rnatilgan ramziy bir timsoldir. Ayni paytda Yangi O‘zbekistonda madaniyat va san’atni ravnaq toptirish yo‘lida olib borayotgan barcha islohotlarimiz va ularning amaliy natijalari bu ulug‘ ijodkorga eng munosib yodgorlik bo‘ladi”, — dedi davlati rahbari.
2021-yilda Shavkat Mirziyoyevning farmoni bilan Botir Zokirov “El-yurt hurmati” ordeni bilan mukofotlangandi. O‘sha yilda O‘zbekiston davlat konservatoriyasi huzurida Botir Zokirov nomidagi Milliy estrada san’ati instituti tashkil etildi. Ushbu konservatoriya huzurida Botir Zokirov nomidagi milliy estrada san’ati instituti barpo etildi. Uning nomidagi milliy mukofot ta’sis etildi, ilmiy va badiiy asarlar, hujjatli film va spektakllar yaratildi.
Izoh (0)