O‘zbekiston Kibersport assotsiatsiyasi prezidenti Doniyor Jo‘rayev “Sigma podkast” loyihasining navbatdagi sonida mamlakatda kibersportning rivojlanishi, unga qaratilayotgan eʼtibor, ota-onalarning munosabati va ushbu sohadagi o‘zgarishlar hamda maoshlar haqida so‘zladi.
“Albatta, ota-bobolarimiz boshqa narsalarga qiziqqan bo‘lishi mumkin, lekin har bir avlodning o‘z qiziqishlari bor va bu yaxshi yoki yomonligini hech kim aytolmaydi. Yoshlarni chegaralash kerak emas”, – Doniyor Jo‘rayev.
Assotsiatsiya prezidenti eng yirik o‘yin ishlab chiqaruvchilardan biri Tencent kompaniyasi O‘zbekistonda serverlarini o‘rnatgani mamlakat imiji uchun katta ish bo‘lganini taʼkidlab o‘tdi. Shuningdek, boshqa ishlab chiqaruvchilar bilan ham muzokaralar ketayotganini maʼlum qildi.
“Bajaradigan vazifasi va qatnashayotgan turnirlariga qarab o‘yinchilar 6 milliondan 12 million so‘mgacha oylik maosh oladi”.
Eski davrlarda kompyuter o‘yinlari va kibersportning faqatgina zararli tomonlariga urg‘u berilardi. Turli xil reydlar, nafratga to‘lib toshgan ko‘rsatuvlar tayyorlanardi, lekin hozirda hukumatning kibersportga nisbatan munosabati tubdan o‘zgargan.
“Kibersportga kirish oson. Istalgan jismoniy holatdagi va yoshdagi shaxs u bilan professional shug‘ullana oladi. Kibersportda imkoniyatlar hammada teng. Murabbiylar nazorati ostida amalga oshirilsa, bundan hech kim zarar ko‘rmaydi. Biz o‘yinchilar uchun barcha sharoitlarni yaratmoqdamiz”, — deydi Doniyor Jo‘rayev.
Shuningdek, assotsiatsiya prezidenti yaqinda bo‘lib o‘tgan Uzbekistan Esports Championship turniriga to‘xtalib o‘tdi. Turnirga O‘zbekiston uchun rekord miqdordagi 350 million so‘m sovrin jamg‘armasi qo‘yilgan. Unda O‘zbekistonning barcha hududlaridan jamoalar qatnashgan.
O‘zbekiston 2026-yil “Kelajak o‘yinlari”ga ham mezbonlik qilishi kutilmoqda va Doniyor Jo‘rayev ushbu yirik turnir uchun tayyorgarlik ishlari boshlangani maʼlum qildi. “Kelajak o‘yinlari” — bellashuvlar bir vaqtning o‘zida sportning anʼanaviy turlari va ularning raqamli muqobillarida o‘tkaziladigan yuqori texnologik musobaqadir. Turnirda 100 dan ortiq mamlakat ishtirok etadi va bahslar 21 ta innovatsion yo‘nalish bo‘yicha o‘tkaziladi.
Izoh (0)