Ўзбекистонлик киберспортчилар қанча маош олади?

Ўзбекистон Киберспорт ассоциацияси президенти Дониёр Жўраев “Сигма подкаст” лойиҳасининг навбатдаги сонида мамлакатда киберспортнинг ривожланиши, унга қаратилаётган эътибор, ота-оналарнинг муносабати ва ушбу соҳадаги ўзгаришлар ҳамда маошлар ҳақида сўзлади.

“Албатта, ота-боболаримиз бошқа нарсаларга қизиққан бўлиши мумкин, лекин ҳар бир авлоднинг ўз қизиқишлари бор ва бу яхши ёки ёмонлигини ҳеч ким айтолмайди. Ёшларни чегаралаш керак эмас”, – Дониёр Жўраев.

Ассоциация президенти энг йирик ўйин ишлаб чиқарувчилардан бири Tencent компанияси Ўзбекистонда серверларини ўрнатгани мамлакат имижи учун катта иш бўлганини таъкидлаб ўтди. Шунингдек, бошқа ишлаб чиқарувчилар билан ҳам музокаралар кетаётганини маълум қилди. 

“Бажарадиган вазифаси ва қатнашаётган турнирларига қараб ўйинчилар 6 миллиондан 12 миллион сўмгача ойлик маош олади”. 

Эски даврларда компьютер ўйинлари ва киберспортнинг фақатгина зарарли томонларига урғу бериларди. Турли хил рейдлар, нафратга тўлиб тошган кўрсатувлар тайёрланарди, лекин ҳозирда ҳукуматнинг киберспортга нисбатан муносабати тубдан ўзгарган.

“Киберспортга кириш осон. Исталган жисмоний ҳолатдаги ва ёшдаги шахс у билан профессионал шуғуллана олади. Киберспортда имкониятлар ҳаммада тенг. Мураббийлар назорати остида амалга оширилса, бундан ҳеч ким зарар кўрмайди. Биз ўйинчилар учун барча шароитларни яратмоқдамиз”, — дейди Дониёр Жўраев.

Шунингдек, ассоциация президенти яқинда бўлиб ўтган Uzbekistan Esports Championship турнирига тўхталиб ўтди. Турнирга Ўзбекистон учун рекорд миқдордаги 350 миллион сўм соврин жамғармаси қўйилган. Унда Ўзбекистоннинг барча ҳудудларидан жамоалар қатнашган. 

Ўзбекистон 2026 йил “Келажак ўйинлари”га ҳам мезбонлик қилиши кутилмоқда ва Дониёр Жўраев ушбу йирик турнир учун тайёргарлик ишлари бошлангани маълум қилди. “Келажак ўйинлари” — беллашувлар бир вақтнинг ўзида спортнинг анъанавий турлари ва уларнинг рақамли муқобилларида ўтказиладиган юқори технологик мусобақадир. Турнирда 100 дан ортиқ мамлакат иштирок этади ва баҳслар 21 та инновацион йўналиш бўйича ўтказилади.