Туркия ҳарбийлари 13 май куни Ироқ шимолида Курдистон ишчи партиясига алоқадор 3 нафар террорчини йўқ қилган. Бу ҳақда Туркия Миллий мудофаа вазирлиги баёнотига асосланиб, Anadolu нашри хабар берди.
Манбада айтилишича, жангарилар Ироқ шимолидаги махсус операция зонасида йўқ қилинган. Ушбу хабарни Туркия Миллий мудофаа вазирлиги ҳам, бошқа бир қанча Туркия давлат ташкилотлари ҳам тасдиқлаган.
“Қаҳрамон турк қуролли кучларимиз терроризмни ўз манбасида йўқ қилиш учун тўхтовсиз амалиётларни давом эттирмоқда. Террорчилар объектларини йўқ қилишда қатъият билан давом этамиз”, — дейилади Туркия Миллий мудофаа вазирлиги баёнотида.
Жангарилар Қандил минтақасида нишонга олингани хабар қилинган. Расмийлар уларнинг бевосита Курдистон ишчи партиясига алоқадор бўлганини билдирган.
Маълумот ўрнида, Курдистон ишчи партияси 40 йилдан ортиқ вақтдан бери Туркия ва Яқин Шарқ ҳудудида террорчилик ҳужумлари ташкил этиб келади. Партия расман Туркия, АҚШ ва Европа Иттифоқи томонидан террорчи ташкилотлар рўйхатига киритилган. Партия уюштирган терактлар оқибатида умумий 40 минг нафардан ортиқ одам, жумладан, аёллар, болалар ва гўдаклар ҳалок бўлгани хабар қилинади.
Изоҳ (0)