Norvegiya tashqi ishlar vaziri Espen Bart Eyde BMT rahbariyatini Falastinni tashkilotga qabul qilishga chaqirdi. Bu haqda G‘arb manbalariga asoslanib, Anadolu nashri xabar berdi.
Manbada aytilishicha, Espen Bart Eyde Norvegiya rahbariyati BMT Bosh assambleyasida Falastinni qo‘llab ovoz berishni rejalashtirayotganini, Falastinning o‘z ovoziga ega bo‘lish yo‘lidagi kurashini qo‘llab-quvvatlashini maʼlum qilgan.
“Norvegiya Falastinning BMTga to‘laqonli aʼzolik maqomini olish haqidagi arizasini qo‘llab-quvvatlashini va Bosh assambleyada ovozga qo‘yish kuni uni yoqlab ovoz berishini ochiq-oydin maʼlum qiladi”, — deyiladi Norvegiya tashqi ishlar vaziri bayonotida
Hozirga qadar Falastinning BMTga qabul qilinishiga AQSH, Isroil, Vengriya, Argentina, Mikroneziya, Nauru, Palau va Papua-Yangi Gvineya kabi mamlakatlar qarshi chiqqan. Birlashgan Arab Amirliklari boshchilik qilgan rezolyutsiya ko‘pchilik tomonidan qo‘llab-quvvatlanib, 143 aʼzo davlat uni yoqlagan. 9 davlat qarshi va 25 mamlakat betaraf pozitsiya eʼlon qilgan.
Falastin vakillari BMT Bosh assambleyasi tomonidan maʼqullangandan so‘ng BMTning turli qo‘mitalari tarkibiga saylanishi mumkin. Eydening so‘zlariga ko‘ra, ovoz berish Falastinning BMTga to‘laqonli aʼzo bo‘lishi va ikki davlat yechimi keng miqyosda qo‘llab-quvvatlayotganini aks ettirgan.
Izoh (0)