Россия Ташқи ишлар вазирлиги матбуот котиби Мария Захарова АҚШнинг Ҳиндистонни диний эркинлик ҳуқуқларини бузаётганликда айблаши мамлакатдаги умумий сайловлар вақтида вазиятни беқарорлаштиришга қаратилганини маълум қилди. Бу ҳақда “ТАСС” нашри хабар берди.
“АҚШнинг Нью-Деҳлини диний эркинликни бузганликда мунтазам асоссиз айблашлари АҚШнинг миллий менталитетни, Ҳиндистон мамлакати ривожланишининг тарихий контекстини нотўғри тушуниши ва Ҳиндистонга нисбатан ҳурматсизликдан бошқа нарса эмас. Вашингтон мамлакатда бўлиб ўтадиган умумий сайловларни мураккаблаштириш учун Ҳиндистондаги ички сиёсий вазиятни беқарорлаштириш ниятида”, — деган Мария Захарова.
Олдинроқ Ҳиндистон ташқи ишлар вазири Субраҳманям Жаишанкар мамлакатда умумий сайловлар июнь ойигача бўлиб ўтишини маълум қилган эди. Сайлов олдидан ҳукумат шаффофликни таъминлаш учун халқаро кузатувга рухсат берган.
Ҳозирга қадар Ҳиндистонда умумий 968 миллион киши сайловчи сифатида рўйхатга олинган. Бутун мамлакатда сайлов комиссиялари ходимлари 14 миллион нафарга етган. Расмийлар 1,2 миллион сайлов кабинаси билан дунёдаги энг йирик овоз бериш жараёнлари амалга оширилишини билдирган.
Қатор Ғарб нашрлари ҳинд ҳукуматини сайлов арафасида этник озчиликлар ва алоҳида диний гуруҳларнинг ҳуқуқларини бузганликда айблаган. Фуқаролар сайлов ҳуқуқидан фойдалана олмаётганини маълум қилган. Ҳукуматлар Деҳлини терроризм хавфи баҳонаси билан конституциявий ҳуқуқларни чекламасликка чақирган.
Изоҳ (0)