Xakerlar Britaniya Mudofaa vazirligi harbiylari va xodimlarining shaxsiy maʼlumotlarini o‘z ichiga olgan maʼlumotlar bazasiga buzib kirdi. Bu haqda Sky News xabar berdi.
Xakerlik hujumi ortida kim turgani noma’lum. Sky News hukumat aniq bir davlat nomini aytmasa-da, xakerlar Xitoy rasmiylariga aloqador deb hisoblaydi. Ular harbiylarning ish haqi va bank hisobraqamlarini saqlaydigan tizimga kirishga muvaffaq bo‘lgan. Tizimda Britaniya armiyasi, dengiz floti va havo kuchlarining amaldagi va sobiq aʼzolarining shaxsiy maʼlumotlari hujjatlar ko‘rinishida saqlangan.
Ta’kidlanishicha, xakerlar Mudofaa vazirligining tezkor ma’lumotlariga kira olmagan. Vazirlik hujumni aniqlab, darhol chora ko‘rgan va tizimga tashqi kirishni uzib qo‘ygan. Britaniya mudofaa vaziri Grant Shapps holat yuzasidan bayonot berishi va jabrlangan harbiy xizmatchilarni himoya qilish bo‘yicha chora-tadbirlarni o‘z ichiga olgan “reja”ni ulashishi kutilmoqda.
Izoh (0)