O‘zbekiston TIV Xitoy va Braziliyada o‘nlab odamlar hayotiga zomin bo‘lgan suv toshqinlari yuzasidan hamdardlik bildirdi.
“Xitoy va Braziliyada o‘nlab odamlarning hayotiga zomin bo‘lgan kuchli yog‘ingarchiliklarning halokatli oqibatlari haqidagi xabarlarni chuqur qayg‘u bilan qabul qildik. O‘zbekiston TIV nomidan qurbon bo‘lganlarning yaqinlariga hamdardlik bildiramiz va barcha jarohatlanganlarning tezroq sog‘ayib ketishini tilaymiz”, — deb yozdi vazirlik rahbari Baxtiyor Saidov.
Braziliya janubidagi Riu-Grandi-du-Sul shtatida kuzatilgan suv toshqinlari oqibatida 3-may holatiga ko‘ra 29 kishi halok bo‘ldi, 60 kishi bedarak yo‘qoldi.
29-aprel kuni boshlangan yomg‘irlar oqibatida shtatdagi 150 dan ortiq shahar tabiiy ofatdan zarar ko‘rgan. 213 ta munitsipalitet suv toshqinlari, to‘g‘onlarning buzilishi va ko‘chkilar haqida xabar bergan, 10 ming kishi uy-joysiz qolgan. 500 mingdan ortiq uy suv taʼminotidan, 300 mingdan ortiq uy esa elektr taʼminotidan uzilgan.
Shtat gubernatori Eduardo Leyte 1-may kuni suv toshqini keltirgan zarar tufayli favqulodda holat e’lon qildi.
Xitoyda esa kuchli yomg‘ir oqibatidagi suv toshqinlari mamlakat janubidagi Guandun provinsiyasida yuz berdi. The Washington Post bergan ma’lumotga ko‘ra, Xitoy janubidagi ushbu suv toshqini so‘nggi 50 yildagi eng kuchlisi bo‘ldi.
Izoh (0)