Afg‘onistonda kuchli yog‘ingarchilik va suv toshqinlari oqibatida kamida 66 kishi halok bo‘ldi. Bu haqda rasmiylarga tayanib, Arab News xabar berdi.
Qurbonlarning ko‘pchiligi uylari qulab tushishi oqibatida halok bo‘lgan. Respublikaning aksariyat viloyatlarida uylar, infratuzilma va qishloq xo‘jaligi yerlariga zarar yetgan.
“Dastlabki ma’lumotlarga ko‘ra, kamida 66 kishi halok bo‘ldi, 36 kishi jarohat oldi”, — deydi tabiiy ofatlarni boshqarish milliy boshqarmasi matbuot kotibi Janan Sayiq.
Tabiiy ofat oqibatida 600 bosh chorva nobud bo‘lgan, 1235 ta uyga zarar yetgan. Mamlakatning 34 viloyatidan 23 tasida suv toshqini qayd etilgan. Bu ekinlarga zarar yetkazib, oziq-ovqat xavfsizligiga yanada ta’sir qilishi mumkin.
“Bug‘doy ekinlari bir necha haftadan so‘ng yig‘ib olishga tayyor bo‘ladi. Ammo yog‘ingarchilik uning katta qismini yo‘q qilishi mumkin”, — deydi Lag‘mon viloyatidan fermer Gul Husayn.
Kuchli yomg‘ir va suv toshqinlari Fors ko‘rfazi mintaqasini ham qamrab olgan. Ummonda kamida 18 kishi halok bo‘ldi, Birlashgan Arab Amirliklarida esa barcha parvozlar to‘xtatildi. Bahrayn, Qatar va Saudiya Arabistonida ham kuchli yomg‘irlar kuzatilmoqda. Bundan tashqari qo‘shni Qozog‘istonda va Rossiyada ham suv toshqinlari kuzatilib, talafotlarni bartaraf etish ishlari olib borilmoqda.
Izoh (0)