Ўзбекистон ТИВ Хитой ва Бразилияда ўнлаб одамлар ҳаётига зомин бўлган сув тошқинлари юзасидан ҳамдардлик билдирди.
“Хитой ва Бразилияда ўнлаб одамларнинг ҳаётига зомин бўлган кучли ёғингарчиликларнинг ҳалокатли оқибатлари ҳақидаги хабарларни чуқур қайғу билан қабул қилдик. Ўзбекистон ТИВ номидан қурбон бўлганларнинг яқинларига ҳамдардлик билдирамиз ва барча жароҳатланганларнинг тезроқ соғайиб кетишини тилаймиз”, — деб ёзди вазирлик раҳбари Бахтиёр Саидов.
Бразилия жанубидаги Риу-Гранди-ду-Сул штатида кузатилган сув тошқинлари оқибатида 3 май ҳолатига кўра 29 киши ҳалок бўлди, 60 киши бедарак йўқолди.
29 апрель куни бошланган ёмғирлар оқибатида штатдаги 150 дан ортиқ шаҳар табиий офатдан зарар кўрган. 213 та муниципалитет сув тошқинлари, тўғонларнинг бузилиши ва кўчкилар ҳақида хабар берган, 10 минг киши уй-жойсиз қолган. 500 мингдан ортиқ уй сув таъминотидан, 300 мингдан ортиқ уй эса электр таъминотидан узилган.
Штат губернатори Эдуардо Лейте 1 май куни сув тошқини келтирган зарар туфайли фавқулодда ҳолат эълон қилди.
Хитойда эса кучли ёмғир оқибатидаги сув тошқинлари мамлакат жанубидаги Гуандун провинциясида юз берди. Тhе Washington Post берган маълумотга кўра, Хитой жанубидаги ушбу сув тошқини сўнгги 50 йилдаги энг кучлиси бўлди.
Изоҳ (0)