Ukraina kamikadze dronlari 1-may kuni Rossiyaning Belgorod viloyatidagi aholi punktlariga hujum uyushtirdi. Bu haqda “TASS” nashri xabar berdi.
Manbada aytilishicha, dronlar dastlab Belgorodskiy tumanidagi Yasniye Zori aholi maskaniga kelib urilgan. Bu to‘g‘risida viloyat gubernatori Vyacheslav Gladkov rasman maʼlumot bergan.
“Belgorodskiy tumanidagi Yasniye Zori hududiga Ukrainaning xudkush dronlari hujum qildi. Dronlar hujumi va keyingi portlash oqibatida qurbonlar bo‘lgani haqida maʼlumot yo‘q. Ikki yo‘lovchi mashinasiga zarar yetgan”, — deyiladi rasmiy xabarda.
Rasmiylar voqea joyida tez yordam va qutqaruv xizmatlari ishlayotganini maʼlum qilgan. Dronlar urilgan fuqarolik va davlat inshootlari tez fursatda qayta ishga tushirilishi aytilgan.
Maʼlumot o‘rnida, joriy yilning 24-aprel kuni Ukraina kamikadze dronlari Rossiyaning Smolensk viloyatidagi neft bazalariga hujum uyushtirgan edi. Hujumdan so‘ng yonilg‘i-energetika obyektlarida yirik masshtabda yong‘in kelib chiqqan. Obyektlardagi xodimlar evakuatsiya qilingan. Rasmiylar nishonga olingan obyektlarda 26 ming kub metr Rossiya yonilg‘isi saqlanayotganini maʼlum qilishgan.
Izoh (0)