Тошкент вилояти Экология бошқармаси Сирдарё сув ҳавзаси шўбаси инспекторлари томонидан 29 апрель куни Сирдарё дарёсининг ўнг қирғоғида назорат тадбирлари ўтказилди. Бу ҳақда Экология вазирлиги матбуот хизмати хабар берди.
Шундай тадбирлардан бирида инспекторлар браконьерлар ҳужумига учради.
Маълум бўлишича, рейд давомида Сирдарё дарёсининг Оққўрғон туманидан оқиб ўтувчи ҳудудида инспекторлар номаълум фуқаролар томонидан тақиқланган қуроллар, яъни лескали тўр, моторли қайиқ ёрдамида балиқ овланаётгани ҳолатига дуч келади. Сирдарё сув ҳавзаси шўбаси бошлиғи Д.Зоҳидов ва бош давлат инспектори Т.Бўриев ҳуқуқбузарлик ҳолатига чек қўйиш мақсадида ноқонуний балиқ овлаётган фуқароларни ёнига қайиқ билан боради. Аммо шу пайтда ҳуқуқбузарлар инспекторларга ҳужум қилиб, уларни сувга итариб юборади.
Шунингдек, браконьерлар инспекторларни сувга чўктириш мақсадида резина қайиқни ёради. Бундай ҳолатда қандай йўл тутишни билган инспекторлар эса дарёни қирғоғига сузиб чиқади. Буни кўрган ҳуқуқбузарлар инспекторларни ҳақоратлаб, ов қуролларини олиб қочиб кетади.
Мазкур ҳолат бўйича ҳуқуқбузарларнинг шахсига аниқлик киритиш ҳамда ҳолатга ҳуқуқий баҳо бериш мақсадида тегишли ҳужжатлар Тошкент вилояти прокуратураси ва вилоят ИИБга юборилди.
Бош прокуратура матбуот хизматининг хабар беришича, ҳолат юзасидан Тошкент вилояти прокуратураси томонидан тергов ҳаракатлари олиб борилмоқда. Текширув натижаларига кўра ҳуқуқий баҳо берилиши маълум қилинди.
Изоҳ (0)