Isroil bosh vaziri Binyamin Netanyaxu o‘t ochishni to‘xtatish va garovga olinganlarni ozod qilish bo‘yicha kelishuvga erishilishidan qat’i nazar, Rafahda HAMASga qarshi operatsiya o‘tkazilishini ma’lum qildi. Bu haqda Deutsche Welle xabar berdi.
Urushni barcha maqsadlarga erishgunga qadar to‘xtatish fikri hatto muhokama qilinmagan, — dedi Netanyaxu.
Tagesschau nashriga ko‘ra, bosh vazirning bayonoti qarshi tomon Isroilning 40 kunlik o‘t ochishni to‘xtatish haqidagi taklifini ko‘rib chiqayotgan paytga to‘g‘ri kelgan. Taklif doirasida falastinlik mahbuslarning ham Isroil qamoqxonalaridan ozod etilishi muhokama qilinmoqda.
HAMAS vakillari Isroil taklifini o‘rganish uchun Qohirani tark etishgan. Misr poytaxtiga uchishni rejalashtirgan Isroil delegatsiyasi safarini keyinga qoldirdi. Isroil OAVlariga ko‘ra, Isroil birinchi navbatda HAMASning javobini kutmoqchi ekanini aytgan.
Avvalroq AQSH davlat kotibi Entoni Blinken G‘azo xalqi bilan o‘t ochishni to‘xtatish o‘rtasida turgan yagona to‘siq HAMAS ekanini aytgan edi. U HAMASni sulhga rozi bo‘lishga chaqirgan.
Izoh (0)