Isroil hujumlari tufayli G‘azoda o’lganlar soni 34 ming kishidan oshib ketdi

Isroilning 7-oktyabrdan buyon G‘azoga uyushtirgan hujumlarida halok bo‘lganlar soni 34 097 kishiga yetdi. Bu haqda Al Jazeera xabar berdi.

Ma’lum qilinishicha, hujumlarda 76 980 kishi yaralangan. Oxirgi 24 soat ichida kamida 48 nafar falastinlik halok bo‘lgan, 79 kishi jarohat olgan. Halok bo‘lganlar soni ancha yuqori bo‘lishi mumkin, minglab jasadlar Isroil zarbalari natijasida vayron bo‘lgan binolar ostida qolmoqda.

“Isroil bosqinchi kuchlari G‘azo sektorida so‘nggi 24 soat ichida oilalarga qarshi beshta qirg‘inni amalga oshirdi, oqibatda 48 kishi shahid bo‘ldi va 79 kishi yaralandi. Ko‘p odamlar hali ham vayronalar ostida va yo‘llarda qolmoqda, chunki qutqaruvchilar ularga yetib bora olmayapti”, — deydi Sog‘liqni saqlash vazirligi.

Isroil harbiylari 21-aprel tunda Rafahga bergan kamida ikkita aviazarbasi oqibatida bir oiladan 13 nafar bola va ikki ayol halok bo‘ldi.

“Isroilning G‘azodagi aholi zich joylashgan Rafah shahridagi turar-joyga uyushtirgan zarbasidan dahshatga tushdim, ko‘p bola halok bo‘ldi. Biz bu jangni zudlik bilan to‘xtatib, mojaroga chek qo‘yishimiz kerak”, — dedi Buyuk Britaniyaning Hamdo‘stlik bo‘yicha davlat kotibi Tariq Ahmad.