Kanadaning Toronto shahrida bo‘lib o‘tgan FIDE Nomzodlar turnirida 14 ta turdan so‘ng hindistonlik Gukesh Dommaraju 9 ochko bilan g‘oliblikni qo‘lga kiritdi. Endi u shaxmat toji uchun amaldagi jahon chempioni xitoylik Din Lijen bilan o‘ynash huquqini qo‘lga kiritdi.
Qiziqarlisi, Gukesh nomzodlar turnirida g‘alaba qozongan tarixdagi eng yosh shaxmatchi bo‘ldi.
Gukeshdan keyingi o‘rinlarni Hikaru Nakamura, Yan Nepomnyashiy va Fabiano Karuana 8,5 ochko bilan egalladi.
Oxirgi turda Gukesh va Nakamura bahs olib bordi. Bu to‘qnashuv durang bilan yakunlandi. Ushbu o‘yindagi Nakamuraning g‘alabasi unga turnir g‘olibligini taqdim etishi mumkin edi. Shuningdek, oxirgi turda Nepomnyashiy va Karuana qarama-qarshiligi yuzaga keldi. Ushbu uchrashuvdagi tomonlarning g‘alabasi Gukesh bilan tay-brekda kuch sinashish huquqini berar edi. O‘yin durang bilan yakunlandi va Gukesh turnir g‘olibligini qo‘lga kiritdi.
Turnirda g‘olib bo‘lgan Gukesh 111 ming yevro pul mukofotiga ega chiqdi. Undan keyingi o‘rinlarni olgan uch shaxmatchiga 79 ming yevrodan topshiriladigan bo‘ldi.
Izoh (0)