Nomzodlar turniri — 2024. Yan Nepomnyashiy 6-turda durang qayd etdi. Onlayn reytingda Nodirbek Abdusattorov rossiyalik shaxmatchiga o‘rnini bo‘shatdi

10-aprel kuni Toronto shahrida shaxmat bo‘yicha nomzodlar turnirida 6-tur o‘yinlari bo‘lib o‘tdi.

Rossiyalik Yan Nepomnyashiy oq donalar bilan amerikalik Fabiano Karuana bilan durang o‘ynadi. Qolgan o‘yinlarda quyidagi natijalar qayd etildi: 

6-tur

Gukesh Dommaraju (Hindiston) – Hikaru Nakamura (AQSH) – 0,5:0,5

Yan Nepomnyashiy (Rossiya) – Fabiano Karuana (AQSH) – 0,5:0,5

Santosh Vidit (Hindiston) – Aliriza Firuzja (Fransiya) – 1:0

Rameshbabu Pragnanandha (Hindiston) – Nijat Abasov (Ozarbayjon) – 1:0

Turnir jadvalida Yan Nepomnyashiy va Gukesh 4 ochko to‘plab yetakchilik qilmoqda. Karuana, Pragnanandhada 3,5 ochko, Vidit, Nakamura 3 ochko to‘plagan. 

Ushbu turnirda ijobiy natija qayd etayotgan Yan Nepomnyashiy onlayn reytingda jahonda 4-o‘ringa ko‘tarilib, Nodirbek Abdusattorovni ortda qoldirmoqda. 

Hamyurtimiz Nodirbek Abdusattorov ushbu turnirda ishtirok etish huquqini qo‘lga kirita olmagan.

Eslatib o‘tamiz, onlayn reyting hech qanday rasmiy ifoda kasb etmaydi. Rasmiy FIDE reytingi har oyning so‘nggida yangilanadi.