Канаданинг Торонто шаҳрида бўлиб ўтган FIDE Номзодлар турнирида 14 та турдан сўнг ҳиндистонлик Гукеш Доммаражу 9 очко билан ғолибликни қўлга киритди. Энди у шахмат тожи учун амалдаги жаҳон чемпиони хитойлик Дин Лижен билан ўйнаш ҳуқуқини қўлга киритди.
Қизиқарлиси, Гукеш номзодлар турнирида ғалаба қозонган тарихдаги энг ёш шахматчи бўлди.
Гукешдан кейинги ўринларни Ҳикару Накамура, Ян Непомняший ва Фабиано Каруана 8,5 очко билан эгаллади.
Охирги турда Гукеш ва Накамура баҳс олиб борди. Бу тўқнашув дуранг билан якунланди. Ушбу ўйиндаги Накамуранинг ғалабаси унга турнир ғолиблигини тақдим этиши мумкин эди. Шунингдек, охирги турда Непомняший ва Каруана қарама-қаршилиги юзага келди. Ушбу учрашувдаги томонларнинг ғалабаси Гукеш билан тай-брекда куч синашиш ҳуқуқини берар эди. Ўйин дуранг билан якунланди ва Гукеш турнир ғолиблигини қўлга киритди.
Турнирда ғолиб бўлган Гукеш 111 минг евро пул мукофотига эга чиқди. Ундан кейинги ўринларни олган уч шахматчига 79 минг евродан топшириладиган бўлди.
Изоҳ (0)