Fransiya politsiyasi 19-aprel kuni Parijdagi Eron konsullik binosi oldida o‘zini portlatish bilan tahdid qilgan erkakni hibsga oldi. Bu haqda Reuters nashri xabar berdi.
Manbada aytilishicha, erkak konsullik qarshisidagi binoga kirib olgan va o‘zini hamda tevarakdagi binolarni portlatish bilan tahdid qilgan. Parij politsiyasi erkakni xudkush terrorchi hisoblab, unga qarshi keng ko‘lamli harakat boshlagan va hududni o‘rab olgan.
Erkak hibsga olingach, tintuv chog‘ida hech qanday portlovchi modda yo‘qligi aniqlangan. Rasmiylar tergov davom etayotganini maʼlum qilgan.
Parij politsiyasining Reuters agentligiga xabar berishicha, erkak mahalliy vaqt bilan ertalab soat 11:00 da konsullik binosi oldida paydo bo‘lgan. Uning qo‘lida granata bo‘lgan va xudkush terrorchilarniki kabi portlovchi jilet kiyib olgan.
Tezkor guruhlar favqulodda xabar ortidan konsullik binosi joylashgan butun ko‘chani o‘rab olgan va erkakni zararsizlantirgan. Tintuvda tortib olingan granata va jilet aslida qo‘lbola xavfsiz buyumlar ekani maʼlum bo‘lgan.
Politsiyadagi manbalarning aytishicha, erkak o‘tgan yilning sentyabrida Eron konsulligi yaqinida yong‘in uyushtirishga urinishda gumon qilingan odamning aynan o‘zidir. Le Parisien gazetasi erkak ukasining o‘limi uchun qasos olishga harakat qilib, ushbu xatti-harakatni amalga oshirgan.
Izoh (0)