O‘zbekistonda yil boshidan buyon energiya resurslaridan foydalanish qoidalarini buzish bilan bog‘liq aniqlangan huquqbuzarliklar soni ochiqlandi.
Qayd etilishicha, joriy yilning shu vaqtiga qadar “O‘zenergoinspeksiya” tomonidan iste’molchilarni energiya resurslaridan foydalanish qoidalarini buzish bilan bog‘liq huquqbuzarlik bo‘yicha 1 ming 858 ta ma’muriy ish rasmiylashtirildi. Xususan, ushbu aniqlangan holatlarning 247 tasi elektr va issiqlik energiyasini behuda sarflash bo‘yicha aniqlangan qoidabuzarlik hisoblanadi.
Elektr va issiqlik energiyasini behuda sarflash, ya’ni elektr dvigatellaridan, elektr pechlari va boshqa elektr hamda issiqlik uskunalaridan muntazam ravishda, ishlab chiqarish zarurati bo‘lmagan holda to‘liq foydalanmaslik yoki ularni bekorga ishlatib qo‘yish (kunning yorug‘ vaqtida chiroqlarni yoqib qo‘yish), yoritish uchun elektr energiyasidan xo‘jasizlarcha foydalanish holatlari uchun javobgarlik mavjud.
Bu kabi qoidabuzarlik uchun mansabdor shaxslarga bazaviy hisoblash miqdorining 5 baravaridan 15 baravarigacha miqdorda jarima solishga sabab bo‘ladi.
Xuddi shunday huquqbuzarlik ma’muriy jazo chorasi qo‘llanilganidan keyin bir yil davomida takror sodir etilgan bo‘lsa, mansabdor shaxslarga BHM 15 baravaridan 30 baravarigacha miqdorda jarima solinishini yodda tuting.
Izoh (0)