Energetika vazirligi huzuridagi Elektr energiyasi, neft mahsulotlari va gazdan foydalanishni nazorat qilish inspeksiyasi tomonidan joriy yilning birinchi choragida amalga oshirilgan ishlar haqida “Daryo”ga ma’lumot berildi.
Aytilishicha, joriy yilning birinchi choragida “O‘zenergoinspeksiya” tomonidan huquqni muhofaza qiluvchi organlar va elektr hamda gaz ta’minoti korxonalari mutaxassislari bilan hamkorlikda o‘tkazilgan nazorat tadbirlarida 2 ming 629 ta iste’molchi tomonidan tabiiy gaz va elektr energiyasidan noqonuniy foydalanish holatlari aniqlandi. Xususan, 111,4 mln metr kub tabiiy gaz (167 mlrd 100 mln so‘m) va 111,2 mln kilovatt/soat elektr energiyasidan (166 mlrd 700 mln so‘m) noqonuniy foydalanilishi natijasida davlat manfaatlariga jami 333 mlrd 800 mln so‘m zarar yetkazilgan.
Shuningdek, kripto-aktiv va mayning faoliyati bo‘yicha elektr energiyasidan noqonuniy foydalangan iste’molchilarni aniqlash yuzasidan o‘tkazilgan nazorat tadbirlarida 63 ta holat aniqlandi. Ushbu aniqlangan holatlar yuzasidan elektr ta’minoti korxonasi tomonidan jami 83 mlrd 86 mln so‘m (21 mln 319 ming kilovatt/soat) miqdori qayta hisob-kitob qilindi.
Iste’molchilar tomonidan energiya resurslaridan foydalanish qoidalarini buzish bilan bog‘liq huquqbuzarliklar bo‘yicha 1 ming 832 ta ma’muriy ish rasmiylashtirildi. Xususan, o‘tkazilgan nazorat tabirlarida aniqlangan holatlarning 989 tasi elektr energiyasi, 843 tasi esa tabiiy gazdan foydalanishda qoidabuzarlikka yo‘l qo‘yilgani ma’lum bo‘ldi.
Inspeksiyaning nazorat-kimyo laboratoriyalari tomonidan neft mahsulotlari bo‘yicha olib borilgan sifat nazorati tadbirlari davomida 562 ta AYQSH va korxonadan 819 ta tahlillar olinib, shundan 44 ta holatda 1 mln 617 ming litr neft mahsuloti sifatsizligi aniqlanib, sotuvga chiqarilishi oldi olindi.
Inspeksiya tomonidan iste’molchilarga Davlat xizmatlarini ko‘rsatish bo‘yicha umumiy quvvati 572,7 MVt bo‘lgan jami 2 ming 411 ta obyektning elektr ta’minoti loyihalari ekspertizadan o‘tkazildi. Unga ko‘ra, 1 ming 440 nafar iste’molchining elektr qurilmalari elektr tarmoqlariga ulandi. Shuningdek, energetika obyektlariga tegishli 288 ta obyektning elektr ta’minoti loyihalari kelishilib, shundan 192 ta obyektning elektr qurilmasi ishga tayyorligi bo‘yicha xulosalar berildi.
Elektr tarmoqlarining muhofaza zonalariga noqonuniy ravishda qurilgan 9 ming 544 ta obyekt xatlovdan o‘tkazilib, 8 ming 266 ta obyekt bo‘yicha dalolatnomalar rasmilashtirilib, 1 ming 530 ta obyektning hujjatlari sud organlariga taqdim etildi. 402 ta obyektga nisbatan tegishli choralar ko‘rilgan.
Iste’molchilarga elektr energiyasidan samarali va oqilona foydalanish bo‘yicha 39 ming 603 ta profilaktik tadbir o‘tkazildi. Reaktiv energiyasining kompensatsiya qilinishi bo‘yicha quvvati 50 kVt va undan yuqori bo‘lgan iste’molchilarga 23 mingdan ziyod yozma ko‘rsatmalar berildi hamda 690 ta iste’molchida reaktiv energiyasini kompensatsiya qilish bo‘yicha qurilmalarning o‘rnatilishi ta’minlandi. Berilgan yozma ko‘rsatmalarni bajarmagan 152 ta iste’molchiga ma’muriy bayonnomalar tuzildi.
Energoauditorlar tomonidan yoqilg‘i-energetika resurslari iste’molchilarini energetika tekshiruvidan o‘tkazish bo‘yicha ishlab chiqilgan 41 ta dastur ko‘rib chiqilib, shundan 17 tasining kamchiliklari ko‘rsatilgan holda qaytarildi. Shuningdek, korxonalarda energoaudit tekshiruvi o‘tkazilishini jadallashtirish yuzasidan 375 ta korxonaga ko‘rsatmalar berildi.
Jismoniy va yuridik shaxslardan 489 ta murojaatlar kelib tushgan bo‘lib, shundan 38 tasi ijobiy hal qilingan, 412 tasiga tushuntirish berilgan, 39 tasi o‘rganish jarayonida. Energiya resurslaridan ayrim “tadbirkor”larning noqonuniy foydalanishlari tarmoqlarda ortiqcha yuklanishlarga hamda energiya resurslari ta’minoti barqarorligiga jiddiy ta’sir ko‘rsatmoqda.
Izoh (0)